عيد أبو الحمد لـ"وشوشة": زوجتي تحتاج للحجز بالمستشفى.. ونقابة المهن التمثيلية تتابع حالتها
كشف الفنان عيد أبو الحمد تفاصيل الحالة الصحية لزوجته مؤكدًا أنها تعاني منذ فترة طويلة من مشكلات صحية جعلتها طريحة الفراش مشيرًا إلى صعوبة نقلها من المنزل إلى المستشفى، خاصة أنها لا تستطيع الحركة أو السير على قدميها منذ نحو عام.
وقال عيد أبو الحمد في تصريح خاص لـ"وشوشة"، إن نقابة المهن التمثيلية تدخلت لمتابعة حالة زوجته، بعدما كلف الدكتور أشرف زكي الفنان منير مكرم بمتابعة الأمر ومحاولة توفير الرعاية الطبية اللازمة لها.
وأضاف عيد أبو الحمد قائلاً: "منير مكرم كلمني وقال لي هنحاول نروح مستشفى الدمرداش، لكن أنا وضحت له إن الحالة محتاجة تتحجز في المستشفى، وبالفعل رحنا معهد ناصر، وعملوا لها فحوصات عند دكاترة مخ وأعصاب وباطنة وجراحة، لكن في النهاية ما رضيوش يحجزوها".
وتابع عبد أبو الحمد قائلاً:"زوجتي بقالها سنة وشهر تقريبًا مش بتمشي، ونايمة على السرير طول الوقت، وعندها جرح بقاله سنة ومش راضي يلم، وده محتاج علاج ورعاية طبية، وأنا بعمل لها كل حاجة في البيت على قد ما أقدر".
وعن صعوبة نقلها من المنزل، أوضح عيد أبو الحمد:"أنا ساكن في الدور العاشر، ونزولها من البيت لوحده موضوع صعب جدًا، بنجيب إسعاف، وبتوع الإسعاف بيربطوها في كرسي وينزلوها، ولما نوصل تحت بنحتاج ناس تساعدنا في شيلها، وده موقف صعب جدًا بالنسبة لنا".
وأشار عيد أبو الحمد إلى أن النقابة حاولت إيجاد حلول أخرى لحالة زوجته، قائلًا:"منير مكرم كان بيتابع معايا، واتواصل مع ناس، وكان فيه اقتراح إن الدكاترة ييجوا البيت، لكن اتقال لنا إن حالتها لازم تروح مستشفى، خصوصًا بسبب الجرح، وإنها محتاجة دكتور مخ وأعصاب ودكتور علاج طبيعي ودكتور باطنة".
وكشف عيد أبو الحمد عن تواصل الفنان ياسر جلال معه للاطمئنان على زوجته، قائلًا:"الفنان ياسر جلال كلمني وقال لي مراتك فيها إيه؟ وحكيت له على حالتها، وقال لي لازم تروح مستشفى، وأنا قلت له يا ريت، وهو راجل محترم جدًا وفوق الوصف، وأنا اشتغلت معاه قبل كده وعارف أخلاقه كويس".
واختتم عيد أبو الحمد حديثه قائلًا:"منير قالي استنى يومين وإن شاء الله نحاول نوديها المستشفى، وأنا خايف أصلًا نوديها ويرجعونا تاني، ولسه لحد دلوقتي ما دخلناهاش مستشفى، والحياة ماشية كده وربنا يسهل".
