فلبينو لـ"وشوشة": تعاوني مع محمد الشرنوبي في "بعد الليل" قائم على الصداقة

طرح الفنان محمد الشرنوبي أحدث ألبوماته الغنائية بعد الليل الذي يضم 8 أغنيات متنوعة بمشاركة عدد من الشعراء والملحنين والموزعين ومن بينهم الشاعر فلبينو، الذي شارك في الألبوم بثلاث أغنيات هي زي الغجر وأنا هعمل وخمسة، بتعاونات مختلفة على مستوى الألحان والتوزيع.

وتحدث فلبينو في تصريح خاص لـ"وشوشة" عن كواليس تعاونه مع محمد الشرنوبي في الألبوم، موضحًا أن العلاقة بينهما لا تقوم على فكرة العمل التقليدي، قائلًا:"أنا ما بفكرش مين هيعمل الأغنية أكتر ما بفكر في الأفكار الأول، وبعد كده بنعملها، والأغاني التلاتة اللي اتعاملوا مع الشرنوبي اتعملوا بشكل صحوبية جدًا".

وأضاف فلبينو قائلاً:"كنا دايمًا قاعدين مع بعض وأنا بسمعه حاجات مش بتاعته حاجات لسه كاتبها أو شغال عليها وباخد رأيه فيها بشكل عام، مش شرط إنه يغنيها أغنية “زي الغجر” اتكتبت من سنتين، وسمعتها لشرنوبي، وهو اتحمس للحنها ولحنها ووزعها مع عمرو البنا، ودي من الأغاني اللي بحبها جدًا من الحاجات اللي كتبتها".

وعن أغنية أنا هعمل  أوضح فلبينو قائلاً:"عملتها مع إيهاب عبد الواحد، الفنان الكبير والملحن الخطير، وكنت بسمعها للشرنوبي، وقولت له عملت حاجة حلوة جديدة اسمها “أنا هعمل”، فقال لي: أنا هغنيها، فالموضوع بينا بقى صحوبية أكتر بكتير".

فلبينو يكشف كواليس زي الغجر

وتطرق فلبينو إلى كواليس كتابة زي الغجر، موضحًا أن فكرة الفلكلور كانت تشغله منذ فترة، قائلًا:"من سنتين كان عاجبني جدًا فكرة الفلكلور، وكانت جوايا بشكل ما، وفكرة حرفية صنعة الكتابة جوه حاجات الفلكلور دايمًا في حاجات الفلكلور، أيًا كان جاي من أنهي منطقة جغرافية، بتلاقي اللي بيكتبوه حرفيين جدًا في كتابتهم".

وتابع فلبينو حديثه قائلاً:"كان عاجبني إزاي أحط الإيفورت بتاعي كشاعر وشخصيتي جوه حاجة فلكلورية، ويكون فيها صنعة زي الغجر كانت أغنية لإرضاء غروري الشخصي في الكتابة، وبحبها جدًا".

فلبينو: بيني وبين الشرنوبي كيميا وفيزيا وأحياء

وعن طبيعة التعاون بينه وبين الشرنوبي، قال فلبينو:"للأسف ما بينا كيميا وفيزيا وأحياء وكل الحاجات، أنا وشرنوبي من نفس الجيل، إحنا الاتنين شباب وزي بعض، وعندنا جوه دماغنا حاجات عاجبانا وحاجات مش عاجبانا، فبنهد كتير وبنبني كتير مع بعض".

وأضاف فلبينو قائلاً :"في حاجات ممكن ما تنزلش، بنعمل درافت، وطول الوقت بحاول أقول له تعال نلعب في المطلق ونجرب. ممكن نعملها أغنية ونرميها، أو نعملها إعلان، الموضوع بيبقى صحوبية أكتر بكتير من إننا قاعدين نشتغل ومركزين".

فلبينو يوجه رسالة لمحمد الشرنوبي

ووجه فلبينو رسالة إلى محمد الشرنوبي بعد طرح ألبوم بعد الليل، قائلًا:"أنا عايز أقول لشرنوبي إنه فنان جامد جدًا، وملحن خطير وموزع، وأنا اكتشفت إنه بيوزع رغم إننا أصحاب بقالنا كتير، ولسه عرفت إنه بيعرف يوزع".

واختتم فلبينو حديثه قائلاً :"بشكره على فكرة الألبوم نفسه وبشكره على قد إيه هو مختلف وجريء وقد إيه بيوديه حتت ما كانش موجود فيها وأعتقد إن الناس مع الوقت هتفهم وتقدّر إنه بيفتح مجال جديد في الصناعة، وإن الناس تتأثر بيه وتجرب تعمل حاجات مختلفة عنها هو محتاج ياخد أكبر بكتير من الحتة اللي هو موجود فيها، ونفسي ياخد أجمد حتة في الدنيا، لأنه فنان جامد جدًا".

تفاصيل ألبوم بعد الليل

يضم ألبوم "بعد الليل" 8 أغنيات مختلفة، ومتنوعة، وهى:..

1 - زي الغجر..  كلمات : فلبينو.. الحان : شرنوبي.. توزيع : شرنوبي - عمرو البنا.
2 - حبيت.. كلمات : مصطفى ناصر.. الحان : شرنوبي .. توزيع : شرنوبي.
3 - انا هعمل.. كلمات : فلبينو.. الحان : ايهاب عبد الواحد.. توزيع : إسماعيل نصرت.
4 - غربة.. كلمات : مصطفى ناصر.. الحان : شرنوبي.. توزيع : الوايلي.
5 - على مهلك.. كلمات : مصطفى حدوتة.. الحان : عطار.. توزيع : خوليو.
6 - فين ما تروح.. كلمات :  مصطفى ناصر.. الحان : شرنوبي.. توزيع : شرنوبي.
7 - بعد الليل.. كلمات : شرنوبي.. الحان : شرنوبي.. توزيع : شرنوبي.
8 – خمسة.. كلمات : فلبينو.. الحان : شرنوبي.. توزيع : شرنوبي.