محمد شميس: تكرار «يا ولا» مش تريند.. وبنقلد بعض لحد ما الأغاني فقدت هويتها
علق الناقد الموسيقي محمد شميس على تكرار استخدام لازمة «يا ولا» في عدد من الأغاني التي طُرحت مؤخرًا، مؤكدًا أن الأمر لا يرتبط بكونها جملة قريبة من أذن الجمهور أو اتجاهًا موسيقيًا متعمدًا، وإنما يعكس حالة التقليد التي أصبحت تسيطر على صناعة الأغنية في الفترة الأخيرة.
وقال محمد شميس في تصريح خاص لـ«وشوشة»: «هو بصراحة ملوش علاقة بأن إحنا قريب من ودن الجمهور ولا الكلام ده، كلمة “يا ولا” بتتقال على طول، في أي حاجة في الدنيا، بتستخدم في البيوت وفي الهزار وحتى في المناطق الشعبية، فالموضوع عادي جدًا».
وأضاف: «لكن ليه بتتكرر؟ عشان إحنا مقلدين. موسيقى البوب بقت حاجة سخيفة جدًا، والناس كلها بتقلد، والناس كلها بتتكلم بنفس اللغة وبتتكلم بنفس الطريقة، وبقينا بنسمع نفس التوزيعات والألحان شبه بعض، والهوية مبقاش فيها هوية لأي فنان».
وتابع منتقدًا حالة التشابه المسيطرة على الأغاني: «خلاص يا جماعة بقى زهقنا، إحنا عندنا “بحبك وبتحبيني”، و”هجرتيني”، و”فرقتيني”، و”سيبتيني”، و”كنتيني”، وبعدين دلوقتي “يا ولا يا ولا”.. خلاص بقى يا جماعة».
واستطرد: «ولو طلعت حاجة موضة السنة الجاية ونجحت، هنقعد برضه كل الناس تصدّرها وتتكلّم فيها وتستخدمها، يعني هو ده السيستم. بقت حاجة مملة وبقت حاجة سخيفة».
واختتم محمد شميس حديثه مؤكدًا أن تكرار الأفكار والمفردات انعكس على تفاعل الجمهور مع الأغاني، قائلًا: «عشان كده الأغاني ما بتتسمعش، وعشان كده الناس زهقت منها، وعشان كده أرقامها وحشة ونسب الاستماع بتاعتها أقل بكتير من السنين اللي فاتت، فيعني ده رأيي بكل صراحة».
