فلسطيني ريمكس لـ"وشوشة": كزبرة وعصام صاصا كانوا الأنسب لـ"بيان هام".. ومحمد رمضان مجتهد
كشف الملحن والموزع فلسطيني ريمكس كواليس أغنية “بيان هام”، مؤكدًا أن الفكرة كانت موجودة لديه ولدى الشاعر حازم إكس قبل ترشيح كزبرة وعصام صاصا للمشروع، وقال في تصريح خاص لـ”وشوشة”: “أنا حسيت إنها تجربة جديدة، لأن عصام وكزبرة عمرهم ما غنوا مع بعض، وكانت الفكرة في دماغي أنا وحازم إكس من بدري، ولما المشروع جه وحسينا إن كزبرة وعصام هما اللي هيقدموه، لقينا إنهم أكتر ناس هيضيفوا للفكرة، والحمد لله ربنا وفقنا فيها".
“حازم إكس”.. كيميا مستمرة ومفاجآت في الطريق
وتحدث عن تعاونه المستمر مع حازم إكس، قائلًا: “إحنا بينا كيميا كبيرة، وهو بيكتب وبيلحن، وأنا بلحن وبوزع، ودي مش أول مرة نلحن سوا، عملنا أغاني كتير قبل كده ولسه في مفاجآت جاية".
وأضاف أن التلحين والتوزيع بالنسبة له يسيران جنبًا إلى جنب، موضحًا: “أول ما بتيجي ثيمة اللحن بحس إن التوزيع كله اترسم قدامي، وإحنا لما بندخل أي تجربة بنكون عارفين إحنا عايزين نطلع إيه".
وعن كواليس العمل مع كزبرة وعصام صاصا، قال: “الكواليس كلها كانت ضحك وهزار، وكزبرة في الحقيقة كوميدي جدًا، وعصام شخصية لطيفة جدًا، وكلنا كان هدفنا نطلع حاجة مختلفة، ومحدش بخل على المشروع بأي مجهود".
من الشتاء الماضي.. رحلة طويلة لخروج “بيان هام”
وكشف أن الأغنية استغرقت وقتًا طويلًا في التحضير، قائلاً: “إحنا بنحضر لـ(بيان هام) من الشتا اللي فات، وكل حاجة فيها كانت مدروسة، حتى الميكس والماستر اشتغلنا عليه مع المهندس أمير محروس عشان نوصل لصوت جديد يجمع بين التجاري والمهرجان".
ردود أفعال قوية وسط منافسة ألبومات الكبار
وأعرب عن سعادته بردود فعل الجمهور، مؤكدًا: “الحمد لله كل التعليقات كانت إيجابية، والأغنية حققت حوالي 40 ألف فيديو على تيك توك في يومين، وده رقم كبير، خصوصًا إنها نزلت وسط ألبومات عمرو دياب وتامر عاشور وتامر حسني وأنغام وكايروكي، والحمد لله قدرنا نكون موجودين وسط المنافسة".
كما تحدث عن تعاونه مع الفنانة صابرين النجيلي في أغنية “خطير”، قائلاً: “أنا كنت متابع صابرين من زمان وكنت حابب أشتغل معاها، لأنها عندها شخصية وصوت مختلفين، وحسيت إن مزيكتها قريبة من اللي بقدمه، والحمد لله الأغنية حققت ردود فعل قوية، وإن شاء الله اللي عملناه يبقى خامس هيت ليها، ولسه بينا شغل كتير".
وأشاد بصابرين النجيلي، مضيفًا: “هي من أكتر الشخصيات اللي اتبسطت إني اشتغلت معاها، هي وصفاء أختها والمهندس ماهر صلاح ناس في منتهى الاحترام والمهنية، وأنا سعيد جدًا بالتعاون معاهم".
وتطرق إلى تعاونه مع الفنان محمد رمضان في أغنية “بقولك روح”، مؤكدًا: “دي خامس أو سادس أغنية ليا مع محمد رمضان، وهو من أكتر الشخصيات اللي اتعلمت منها يعني إيه تتعب على شغلك، لأنه بيشتغل بطريقة مش طبيعية، وكل تفصيلة عنده مهمة".
وأضاف: “رمضان متعاون جدًا داخل الاستوديو، وبيتعامل مع كل مشروع كأنه أول وآخر مشروع في حياته، والأغنية سجلها في إنجلترا، وكنا بنعمل كل التعديلات على واتساب لحد ما وصلنا للشكل النهائي، وده بيأكد قد إيه هو حريص على نجاح أي عمل بيقدمه".
فلسطيني ريمكس.. بصمة موسيقية تفرض نفسها
كما يواصل فلسطيني ريمكس ترسيخ مكانته كواحد من أبرز الأسماء في عالم التوزيع الموسيقي خلال الفترة الأخيرة، بعدما نجح في تقديم عدد كبير من الأعمال التي تصدرت التريند وحققت ملايين المشاهدات، بفضل رؤيته الموسيقية المختلفة وقدرته على المزج بين أكثر من لون غنائي، وهو ما جعله شريك نجاح لعدد من أبرز نجوم الساحة الغنائية.
