إلهام شاهين لـ"وشوشة": تحية للنائب ياسر جلال.. تفعيل القانون حق للفنانين

أكدت الفنانة إلهام شاهين في تصريح خاص لـ"وشوشة" دعمها الكامل لمشروع تفعيل قانون حق الأداء العلني، موجهة التحية للفنان والنائب ياسر جلال على اهتمامه بهذا الملف، مشيرة إلى أن القانون ليس جديدًا، وإنما موجود بالفعل منذ عام 2002 ويحتاج فقط إلى تفعيله.

وقالت إلهام شاهين:"أنا طبعًا بحيي النائب الفنان ياسر جلال، والصديق العزيز جدًا، لأن القانون ده موجود من 2002، وكل اللي محتاجه إنه يتفعل وحق الأداء العلني معمول بيه في العالم كله، ومش بس في الدول البعيدة، ده كمان موجود في دول عربية سبقتنا زي المغرب، وأعتقد تونس كمان".

وأضافت إلهام شاهين قائلة:"ده حق أصيل للفنانين، لأن الفنان بعد ما يتعب ويقدم أعمالًا كبيرة بتفضل تتعرض سنين طويلة، من حقه يلاقي حياة كريمة، وما تنتهيش حياته بنهايات صعبة رغم تاريخه الفني".

وتابعت إلهام شاهين حديثها قائلة:"في نفس الوقت الدولة كمان هتستفيد، لأن أي دخل هيدخل للفنان هيكون عليه ضرائب، وبالتالي الدولة هيكون ليها عائد، وكمان نقابة المهن التمثيلية هتستفيد لأنها هتحصل على نسبة، وده هيقوي موارد النقابة".

واختتمت إلهام شاهين حديثها قائلة:"الناس لازم تعرف إننا مبناخدش أي حاجة من المنتج، حق الأداء العلني بيكون من القنوات والمنصات اللي بتعرض الأعمال، وبالتالي ده مش هيأثر على المنتج إطلاقًا، لكنه هيحفظ حق الفنان ويوفرله دخل كريم بعد سنوات طويلة من العطاء".