أحمد جابر لـ"وشوشة": "انتهينا" تجربة حقيقية ورامي جمال غناها من أول ما سمعها دون تغيير كلمة واحدة
شارك الشاعر أحمد جابر في ألبوم دي علامة للفنان رامي جمال من خلال أغنية انتهينا وكشف كواليس كتابتها، وسر اختيار عنوانها، وطبيعة تعاونه مع رامي جمال.
وتحدث أحمد جابر في تصريح خاص لـ"وشوشة"، عن سبب اختياره لعنوان الأغنية، قائلًا:"حسيت إن كلمة (انتهينا) بتدل على نهاية كل حاجة، يعني مفيش فرصة تانية، وحسيتها أفضل تعبير عن نهاية أي شيء، وكمان اسم الأغنية بيلخص مضمونها، لأننا بنتكلم عن النهاية، فدي كانت دلالتها".
وأضاف أحمد جابر أن الأغنية مستوحاة من الواقع، موضحًا:"هي تجربة حقيقية، مش من وحي الخيال خالص، حصلت لحد قريب مني، وأنا قررت أعملها أغنية وأتكلم عن الموضوع زي ما هو، من غير أي تجميل أو تحلية، اللي حصل هو اللي اتكتب بالظبط".
أحمد جابر عن تعاونه مع رامي جمال
وعن تعاونه مع رامي جمال، قال أحمد جابر: "التعاون مع رامي جمال من أحلى التعاونات اللي حصلت في حياتي، هو فنان جميل وراقي، ومقابلته كانت من أجمل المقابلات".
واستكمل أحمد جابر حديثه قائلاً:"والحمد لله الأغنية عجبته من أول ما سمعها، وغناها على طول، ومفيش ولا كلمة اتغيرت، حب الموضوع زي ما هو، وإن شاء الله تعجب الناس".
وكشف أحمد جابر عن الجملة الأقرب إليه في الأغنية، قائلًا:"لو هقول جملة تعبر عن سبب إننا انتهينا، فهي: (كل الناس تغلط عادي.. إنما أنت ملاك)، لأن في ناس كتير مبتشوفش نفسها بتغلط، وشايفة نفسها طول الوقت صح في العلاقة، وده سبب كافي إن أي علاقة تنتهي".
واختتم أحمد جابر حديثه مؤكدًا أنه لم يواجه أي صعوبة في كتابة الأغنية، قائلًا:"الحمد لله، بفضل ربنا، ماكنش فيه أي صعوبة في كتابة الموضوع، لأن القصة حقيقية، والمواضيع الحقيقية بتكون أسهل في الكتابة، لأنها واقع حاصل قدام عينك، وكل اللي عليك إنك تنقله زي ما هو".
