رانيا محمود ياسين لـ"وشوشة": الرئيس السيسي قاد مصر إلى بر الأمان

في ذكرى ثورة 30 يونيو، أكدت الفنانة رانيا محمود ياسين أن هذا اليوم سيظل علامة فارقة في تاريخ مصر الحديث، مشيرة إلى أنه يمثل لحظة فخر واعتزاز لكل المصريين، بعدما نجح الشعب بإرادته الحرة في تغيير مسار الوطن والحفاظ على هويته، مؤكدة أن ما تحقق في ذلك اليوم سيبقى مصدر فخر للأجيال المقبلة.

وتحدثت رانيا محمود ياسين في تصريح خاص لـ"وشوشة"، قائلة:"مقولش طبعًا حاجة غير إن الحمد لله، يوم كله فخر واعتزاز، ويوم شرف على صدورنا جميعًا، والحمد لله كتب وسطر لمصر نقلة مختلفة في تاريخ مصر كله وتاريخ الشعب المصري، وبدأنا بداية جديدة وتخلصنا من حكم طاغي، والشعب بإرادته الحرة قدر إنه يحرك شيء كان يبدو إن إحنا فاكرين إنه شيء قوي، ولكن طلع إنه نظام هش ملوش أي لازمة خالص".

وتابعت رانيا محمود ياسين حديثها قائلة:"فالحمد لله الشعب المصري بإرادته عرف يغير قدره ويغير مستقبله، وكمان قدر إنه يتمسك بهويته، لأن مصر كانت هويتها هتتغير خالص، فالحمد لله قدرنا نتمسك بهويتنا، والحمد لله الرئيس السيسي كان باين من وهو في المشهد في بداياته إن الراجل هو اللي هيقود البلد وهو اللي هيقدر يوصلها لبر الأمان، والحمد لله هو ده اللي حصل، الحمد لله".

وأضافت رانيا محمود ياسين قائلة:"أنا فخورة إن البلد عرفت بإرادتها الحرة، بجيشها وشعبها ومواطنيها البسطاء، إنهم يغيروا ويسطروا تاريخ جديد لمصر، وده إنك تحضري ثورتين في زمانك موضوع مش سهل، وإحنا كشعب بينهم ثورة، لكن ثورة 30 يونيو عملت نقلة في تاريخ مصر، لأن الثورة الأولى كان عليها كثير من التحفظات وكثير من علامات الاستفهام، لكن الثورة دي كانت ثورة شعب حقيقي، ومكنش وراها أي أجهزة ولا ناس متدربة عشان يعملوا حاجات معينة ولا إخوان، دي كان الشعب اللي بيعبر عنها، ودي ثورة طبعًا هيفتخر بيها كل الأجيال اللي جاية، لأنها عملت نقلة ولحقت مصر ولحقت هوية مصر".

وعن أبرز الأعمال الفنية التي تناولت أحداث 30 يونيو، تابعت:"مشوفتش حاجة عملت 30 يونيو غير مسلسل الاختيار، مفيش حاجة تانية اتعملت عن 30 يونيو غير الاختيار، هو بس الاختيار".

واختتمت رانيا محمود ياسين حديثها قائلة:"أتمنى إن إحنا نفضل مصر مستقرة وهادية ومفيهاش أي شيء، والحمد لله إحنا عايشين في سلام وأمان، ومصر كل يوم أحسن من السنين اللي قبلها، وأتمنى إن مصر تفضل في استقرار وسلام وأمان، هو ده أهم حاجة عندي، وإحنا كشعب نعمل اللي علينا، والحكومة تعمل اللي عليها، وكل واحد يعمل اللي عليه".

ثورة 30 يونيو.. محطة فارقة في تاريخ مصر

وتُعد ثورة 30 يونيو من أبرز المحطات في التاريخ المصري الحديث، إذ خرج ملايين المصريين في مختلف المحافظات يوم 30 يونيو 2013 للمطالبة بإجراء انتخابات رئاسية مبكرة، قبل أن تعلن القوات المسلحة في 3 يوليو 2013 خارطة طريق تضمنت تعطيل العمل بالدستور بشكل مؤقت، وتعيين رئيس مؤقت للبلاد، تمهيدًا لإجراء انتخابات رئاسية وبرلمانية وصياغة دستور جديد.

احتفال سنوي بذكرى الثورة

وتحرص الدولة المصرية على إحياء ذكرى ثورة 30 يونيو سنويًا من خلال فعاليات ورسائل رسمية تؤكد أهمية المناسبة في التاريخ الوطني، فيما يستعيد عدد من الفنانين والشخصيات العامة ذكرياتهم عنها، معبرين عن رؤيتهم لما مثلته من مرحلة مفصلية في مسار الدولة المصرية، وما أعقبها من تطورات على مختلف المستويات.