فتوح أحمد لـ"وشوشة":30 يونيو أعادت الأمن لمصر.. وأتمنى عملاً يوثق الحقيقة للأجيال

استعاد الفنان فتوح أحمد ذكرياته مع أحداث 30 يونيو، واصفًا تلك الفترة بأنها من أصعب الفترات التي مرت على المصريين، مشيرًا إلى أن أكثر ما بقي عالقًا في ذهنه هو حالة الانفلات الأمني والشعور بفقدان الأمان، مؤكدًا أن الأمن والاستقرار هما أهم ما يمكن أن تنعم به أي دولة، معربًا عن أمله في تقديم عمل فني يوثق ما جرى بكل تفاصيله للأجيال المقبلة.

وتحدث فتوح أحمد في تصريح خاص لـ"وشوشة"قائلًا:"ذكرى مؤلمة يعني أما ذكرى 30 يونيو أنا ما بفتكرها إلا كشيء صعب جدًا جدًا جدًا وأكتر حاجة بافتكرها قد إيه حسيت إن البلد سابت، ولا أمن ولا حاجة، إن تبقى عايشة وما لكيش ضهر، هو ده كان الوضع بالظبط في 30 يونيو".

وأضاف فتوح أحمد قائلاً:"والرسالة اللي هاقولها للمصريين إن الأمن والأمان أهم من أي حاجة تانية، والحمد لله على اللي إحنا فيه دلوقتي، وافتكروا الأيام السودة اللي كانت حصلت ساعتها، واللجان اللي كانت عاملة في الشارع، وأي حد بلطجي، والبلطجة، وما فيش أمان، وما حدش مأمن لولاده ولا على نفسه، وحالة الانفلات الأمني اللي كانت حاصلة، فدي كانت أيام ربنا ما يعيدهاش تاني على المصريين ولا علينا يا رب".

وتابع فتوح أحمد حديثه قائلاً:"وأمنيتي إن الأعمال اللي اتعملت من رأيي لسه ما اتعملش العمل اللي يوثق الموضوع بصراحة وبصدق شديد، وده مش هيبقى دلوقتي، ده هيتعمل بعد كده لما الدنيا تبص على الموضوع من كل وجهات النظر، فيتعمل عمل يوثق ده بالظبط من جميع وجهات النظر".

وأستكمل فتوح أحمد حديثه قائلاً:"والحاجات اللي اتعملت كانت كويسة، زي الأعمال اللي عملها بيتر ميمي، ومسلسلات الإخوان والشرطة، كانت كويسة، لكن أعتقد إنها اتعملت بشكل سريع، إنما عشان يبقى فيه عمل فيه كل التفاصيل، أعتقد لسه شوية".

وأردف فتوح أحمد قائلاً:"وأمنيتي إنه يتعمل، عشان يبقى وثيقة لكل الشعب المصري بعد كده، يعرفوا إيه اللي حصل، وإيه اللي كان بيتعمل، وإيه الجرايم اللي كانت بتحاك لمصر، وكنا هنروح في حتة وحشة قوي لولا ستر ربنا، ولولا إن الشعب المصري شعب طيب، واللي أنقذه إن ربنا بيحب مصر، والعمار اللي بين ناس كتير عندنا وبين ربنا، ربنا أكرمنا عشان الناس الطيبين اللي في وسطنا، ما تعرفيش هم فين بقى، في الوادي الجديد، في الصعيد، في الفلاحين، في القناة، في بحري، إنما ناس ربنا كرمنا بسببهم".

واختتم فتوح أحمد حديثه قائلاً:"ويا رب يدوم علينا نعمة الأمن والأمان، وإن شاء الله الظروف الاقتصادية تبقى أحسن، وإحنا هنروح لحتة أحسن والله آه في معانا تعب دلوقتي على الجميع، إنما إن شاء الله اللي جاي أفضل، ولازم نتفائل خير بالنسبة للي جاي لمصر".

ثورة 30 يونيو.. محطة فارقة في تاريخ مصر

وتُعد ثورة 30 يونيو من أبرز المحطات في التاريخ المصري الحديث، إذ خرج ملايين المصريين في مختلف المحافظات يوم 30 يونيو 2013 للمطالبة بإجراء انتخابات رئاسية مبكرة، قبل أن تعلن القوات المسلحة في 3 يوليو 2013 خارطة طريق تضمنت تعطيل العمل بالدستور بشكل مؤقت، وتعيين رئيس مؤقت للبلاد، تمهيدًا لإجراء انتخابات رئاسية وبرلمانية وصياغة دستور جديد. تاريخ

احتفال سنوي بذكرى الثورة

وتحرص الدولة المصرية على إحياء ذكرى ثورة 30 يونيو سنويًا من خلال فعاليات ورسائل رسمية تؤكد أهمية المناسبة في التاريخ الوطني، فيما يستعيد عدد من الفنانين والشخصيات العامة ذكرياتهم عنها، معبرين عن رؤيتهم لما مثلته من مرحلة مفصلية في مسار الدولة المصرية، وما أعقبها من تطورات على مختلف المستويات.