طارق الشيخ لـ"وشوشة": 30 يونيو حررتنا.. وأدعو الله أن يحفظ مصر ورئيسها

تحدث المطرب طارق الشيخ عن ذكرى ثورة 30 يونيو، مؤكدًا أنها تمثل بالنسبة له لحظة تحرر وبداية مرحلة جديدة لمصر، مشيرًا إلى أن تلك الفترة كانت مليئة بالمخاوف، قبل أن تستعيد البلاد الأمن والاستقرار، كما أعرب عن أمنيته بأن يحفظ الله مصر ورئيسها، وأن تتحسن الأوضاع الاقتصادية خلال الفترة المقبلة.

وتحدث طارق الشيخ في تصريح خاص لـ"وشوشة" قائلًا:"30 يونيو بتمثل لي إن إحنا تحررنا من كل حاجة، يعني إحنا كان علينا ناس كانت سايبة الدنيا خالص، الإخوان دي".

وتابع طارق الشيخ حديثه قائلاً:"وكنا شايفين إنهم حتى بالنسبة للفن سايبنا نعمل اللي إحنا عايزينه، واتضح فجأة إنهم سايبين نعمل اللي إحنا عايزينه عشان بعد كده يعملوا اللي هما عايزينه فينا، والحمد لله ربنا نجانا منهم، وربنا يخليلنا الريس ويحميهولنا يا رب، ويكفيه شر المرض، ويخليه لمصر، ويخليه للدنيا كلها".

وأستكمل طارق الشيخ حديثه قائلاً:"أما بتيجي 30 يونيو بافتكر إن إحنا لما كنا بنروح الشغل بليل ونبص نلاقي بلطجية طالعة علينا، واللي يوقف يقولك هات مفتاح العربية، واللي يقولك اقلع الدهب اللي معاك، واللي يقولك هات الفلوس اللي معاك، وكنت تتفاجئ إن كل واحد مربي دقنه بيخلص كل حاجة في ثانية، ولو مربتش دقنك مش هتعمل حاجة، بس بقت نعمة من عند ربنا، وربنا يخليلنا الريس عبد الفتاح السيسي، خلى كلهم حلقوا دقنهم".

وأضاف طارق الشيخ قائلاً:"أمنيتي إن ربنا يا رب يصلح الحال، لا أكتر ولا أقل، ومسألة الديون اللي علينا دي، على مصر كلها، ربنا يسدد ما علينا، وإن شاء الله هنبقى في أحسن حتة".

واختتم طارق الشيخ حديثه قائلاً:"دلوقتي إحنا شايفين الدنيا، أنا حاسس إن مصر بقت كبيرة أوي، وأنا عارف إن مصر كبيرة، وبعد التطوير اللي بيحصل فيها، والطرق والكباري اللي بتوصل لكل حتة، حسينا إن مصر كبيرة أوي أوي، كنا الأول ناس مخنا ضيق وعايشين في حتة ضيقة أوي، والحمد لله".

ثورة 30 يونيو.. محطة فارقة في تاريخ مصر

وتُعد ثورة 30 يونيو من أبرز المحطات في التاريخ المصري الحديث، إذ خرج ملايين المصريين في مختلف المحافظات يوم 30 يونيو 2013 للمطالبة بإجراء انتخابات رئاسية مبكرة، قبل أن تعلن القوات المسلحة في 3 يوليو 2013 خارطة طريق تضمنت تعطيل العمل بالدستور بشكل مؤقت، وتعيين رئيس مؤقت للبلاد، تمهيدًا لإجراء انتخابات رئاسية وبرلمانية وصياغة دستور جديد.

احتفال سنوي بذكرى الثورة

وتحرص الدولة المصرية على إحياء ذكرى ثورة 30 يونيو سنويًا من خلال فعاليات ورسائل رسمية تؤكد أهمية المناسبة في التاريخ الوطني، فيما يستعيد عدد من الفنانين والشخصيات العامة ذكرياتهم عنها، معبرين عن رؤيتهم لما مثلته من مرحلة مفصلية في مسار الدولة المصرية، وما أعقبها من تطورات على مختلف المستويات.