محمد التاجي لـ"وشوشة": 30 يونيو أنقذت مصر من استعمار.. وأتمنى عملاً فنيًا يخلد الحقيقة

يرى الفنان محمد التاجي أن ذكرى 30 يونيو تمثل واحدة من أهم المحطات في تاريخ مصر، معتبرًا أنها كانت طوق النجاة الذي أنقذ البلاد من مرحلة وصفها بالأخطر، كما استعاد ذكرى شخصية ارتبطت بتلك الأحداث، مؤكدًا أن ما جرى آنذاك كان سببًا في إنقاذ ابنته من ارتباط كان سيشكل كارثة بالنسبة لها، معربًا عن أمنيته في تقديم عمل فني يوثق تلك المرحلة بصورة أكثر عمقًا وحيادية.

وتحدث محمد التاجي في تصريح خاص لـ"وشوشة"، قائلًا:"بتمثل لي ذكرى 30 يونيو ذكرى إنقاذ البلد من مستعمر كان أنيل وأضل سبيل من أي مستعمر جه على مصر، لا تقولي الهكسوس ولا الإنجليز ولا الفرنساويين ولا أي حد، إحنا كنا دخلنا في استعمار، ومن رحمة ربنا علينا إنه ما استمرش أكتر من سنة، فده أهم ما حدث حصل بالنسبة لنا في ذكرى 30 يونيو، إن إحنا خلصنا من هذا الاستعمار".

وتابع محمد التاجي حديثه قائلاً:"وأكتر حاجة بافتكرها لما بتيجي ذكرى 30 يونيو ملهاش دعوة بأي ذكرى غير بحاجة شخصية ليا أنا، إن بسبب الفكرة دي أو بسبب 30 يونيو و3 يوليو أنا أنقذت بنتي من خطوبة أو من جواز كان هيبقى كارثة عليها، لأن إحنا كنا حاجزين عشان نعمل الخطوبة الرسمية في الحرس الجمهوري يوم 3 يوليو".

واستكمل محمد التاجي حديثه قائلاً:"وأنا فاكر إنهم كلموني الضهر وقالولي إن الموضوع اتأجل تمامًا لأن فيه أحداث أكبر من إنهم يقدروا يعملوا المناسبة دي، قلت لهم شكرًا، والفرصة دي خلتني أبحث ورا العريس لحد ما لقيت إنه ما ينفعناش، والحمد لله ما حصلتش لا خطوبة ولا جواز، وفركشنا الموضوع من بدري، ويمكن دي من أهم الذكريات عندي في ذكرى 30 يونيو و3 يوليو".

واختتم محمد التاجي حديثه قائلاً:"وما فيش عمل، في رأيي، وثق الموضوع ده بشكل سليم، لأنه محتاج حاجة تانية خالص، ومحتاج فكر مختلف، ولازم بعد ما يتهضم الحدث، مش وهو في الثورة أو في الفوران وفي أوله، يعني لازم يعدي فترات كبيرة جدًا على أي حدث، وبعدها نعبر عنه بحيادية تامة، لأن الجيل اللي عاشه هيعبر عنه بالشكل اللي يرضي غروره، لكن حدث كبير زي ده كان لازم يبقى له عمل أكبر وأعمق من الحاجات اللي اتعملت، إحنا لمسناه من برة، لكن لازم التاريخ ده يتهضم تمامًا عشان يطلع منه منتج فني عظيم".

ثورة 30 يونيو.. محطة فارقة في تاريخ مصر

وتُعد ثورة 30 يونيو من أبرز المحطات في التاريخ المصري الحديث، إذ خرج ملايين المصريين في مختلف المحافظات يوم 30 يونيو 2013 للمطالبة بإجراء انتخابات رئاسية مبكرة، قبل أن تعلن القوات المسلحة في 3 يوليو 2013 خارطة طريق تضمنت تعطيل العمل بالدستور بشكل مؤقت، وتعيين رئيس مؤقت للبلاد، تمهيدًا لإجراء انتخابات رئاسية وبرلمانية وصياغة دستور جديد.

احتفال سنوي بذكرى الثورة

وتحرص الدولة المصرية على إحياء ذكرى ثورة 30 يونيو سنويًا من خلال فعاليات ورسائل رسمية تؤكد أهمية المناسبة في التاريخ الوطني، فيما يستعيد عدد من الفنانين والشخصيات العامة ذكرياتهم عنها، معبرين عن رؤيتهم لما مثلته من مرحلة مفصلية في مسار الدولة المصرية، وما أعقبها من تطورات على مختلف المستويات.