هيثم نبيل لـ«وشوشة»: مصطفى حدوتة موهوب
نظمت مجموعة «وشوشة» الإعلامية ندوة خاصة مع الفنان والملحن هيثم نبيل، تحدث خلالها عن عدد من القضايا الفنية، من بينها ظاهرة الألقاب الفنية وأساليب التسويق التي يعتمدها بعض النجوم في الترويج لأنفسهم.
وقال هيثم نبيل في تصريح خاص لـ«وشوشة»، إنه لا يملك أي مشكلة مع الألقاب الفنية أو مع الفنانين الذين يفضلون تقديم أنفسهم باعتبارهم “نمبر وان” أو الأفضل في مجالهم، موضحًا أن لكل فنان طريقته الخاصة في التسويق لنفسه والتواصل مع جمهوره.
وأضاف: «اللي يحب يقول عن نفسه نمبر وان أو أحسن واحد دي حرية شخصية، في ناس بتشوف إن ده أسلوب تسويق مناسب ليها، وفي ناس تانية مبتحبش تعمل كده، وكل واحد حر طالما مش بيضر حد».
وعن الشاعر مصطفى حدوتة، أكد هيثم نبيل أنه يمتلك موهبة حقيقية ويستحق التقدير، قائلاً: «مصطفى حدوتة شخصية جميلة جدًا وموهوب، ولو هو شايف إن أسلوب التسويق ده مناسب ليه فدي وجهة نظره. هو كتب أعمال ناجحة جدًا واتعامل مع نجوم كبار، ومش شايف إنه بيؤذي حد».
وتابع: «الناس عرفته من خلال أغاني المهرجانات، لكن ده لا يمنع إنه قدر يثبت نفسه في ألوان موسيقية مختلفة، وكتب أعمال لعمرو دياب ومحمد منير وأنغام وغيرهم، وبالتالي مش من المنطقي إننا نفضل نحصره في تصنيف واحد ونقول عليه شاعر مهرجانات وبس».
وأشار إلى أن النجاح الحقيقي يرتبط بالاجتهاد والموهبة والثقة بالنفس، موضحًا: «طول ما الإنسان مؤمن برزقه وشطارته واجتهاده، مش هيشغل باله بالمقارنات أو الألقاب».
واختتم هيثم نبيل حديثه قائلاً: «أنا شخصيًا مش من النوع اللي يحب يقول عن نفسه نمبر واحد، أفضل دايمًا إن شغلي هو اللي يتكلم عني ويحكم الناس من خلاله».
