سمية درويش لـ”وشوشة”: نجاح أغنياتي على “تيك توك” بيفاجئني

تحدثت المطربة سمية درويش عن النجاح المتجدد لأغنياتها القديمة وتحول عدد منها إلى تريند عبر منصات التواصل الاجتماعي، مؤكدة أنها لم تكن تتوقع هذا الانتشار الكبير بعد سنوات من طرحها.

وفي تصريح خاص لـ”وشوشة” أعربت سمية درويش عن دهشتها من عودة أغنياتها للواجهة، قائلة: “والله معرفش ليه الأغاني بتطلع تريند، حتى أنا بتفاجئ، أغنية (إنت حياتي) كانت رابع أغنية عندي ترجع تريند بعد أكتر من أغنية تانية”.

وتابعت: “صحابي هم اللي كانوا بيقولولي إن الأغاني تريند، لأني مكنتش متابعة السوشيال ميديا أوي، وحتى مكنتش فاهمة يعني إيه تريند في البداية، وكنت أسألهم يعني إيه؟ فيقولولي إنتِ تريند على تيك توك”.

وأضافت أن سر ارتباطها بأغانيها هو الصدق، موضحة: “أنا مؤمنة إن اللي من القلب بيوصل للقلب، حتى لو النجاح متأخر شوية، مكانه بيبقى محفوظ، لأن عمري ما غنيت غير من قلبي”.

وكشفت سمية درويش عن أسباب ابتعادها عن الساحة الغنائية خلال السنوات الماضية رغم النجاحات التي حققتها، قائلة: “من بعد آخر ألبوم ليا (جديدة) سنة 2014 حصلتلي ظروف كتير صعبة، ومقدرتش أكون قوية بالقدر الكافي إني أكمل شغلي بالشكل المطلوب”.

وأضافت: “اتجوزت سنة 2019، وبعدها بسرعة بقيت حامل، واتسحلت في الحمل والولادة سنة 2020، وبعدها دخلنا في فترة كورونا، فكانت في ظروف كتير خلتني مش مواكبة للساحة الفنية”.

واختتمت حديثها مؤكدة أن ظروف الإنتاج كانت أيضًا من أسباب الغياب، قائلة: “الألبوم الأول كان واخد دعم كبير على مستوى الدعاية والإنتاج، لكن بعد كده الموضوع اختلف، وفي فترة من الفترات مكنش فيه إنتاج معايا أصلًا، وحالتي وقتها مكنتش تسمح إني أنتج لنفسي”.