ولاء الشريف لـ”وشوشة”: كنت بحس إني عايشة وسط عيلتي الحقيقية في “أبو العروسة”
تحدثت الفنانة ولاء الشريف عن كواليس مشاركتها في مسلسل أبو العروسة، مؤكدة أن العمل كان من أقرب التجارب إلى قلبها بسبب الأجواء العائلية التي عاشتها مع فريق المسلسل.
وفي تصريح خاص لـ”وشوشة” كشفت ولاء الشريف عن علاقتها بالفنانة سوسن بدر داخل العمل، قائلة: “طبعًا أنا دايمًا بقولها إنتِ شبه ماما الله يرحمها، حتى في الجزء التاني لما جالها السرطان ده نفس اللي حصل عندي بالظبط، فكنت حاسة إني عايشة في بيتي فعلًا”.
وتابعت: “بابايا شبه عبد الحميد، ومامتي شبه سوسن بدر، وكنت بحب العيلة دي أوي، ودايمًا أقول للمؤلف هاني كمال طلقني ورجعني بيت أهلي، يقولي إنتِ بتتكلمي بجد؟ أقوله بجد عايزة مشاهد أكتر في بيت أهلي”.
وأضافت ولاء الشريف أنها كانت تستمتع كثيرًا بمشاهد الجامعة رغم صعوبتها، موضحة: “كنا بنصور سيكوينسات طويلة ومتعبة جدًا، لكن كنت ببقى مبسوطة أوي، وكارولين عندي في الكرفان وأنا عندها وهي عندي، وديانا وكلنا مع بعض، كنت حاسة إني في البيت عندي فعلًا”.
وعن أكثر الذكريات التي لا تنساها من كواليس العمل، قالت: “كان في حلقة كلنا بناكل فسيخ وقالولنا متتغدوش قبل التصوير، لكن إحنا كنا جعانين جدًا، ولما جه وقت المشهد مكنّاش قادرين نبطل أكل، وده من أكتر المشاهد اللي بحبها وكواليسه كانت حلوة جدًا”.
كما أوضحت ولاء الشريف أنها لا تعتمد في اختياراتها الفنية على حجم الدور، قائلة: “مش مهم مساحة الدور، ممكن أطلع حلقة واحدة بس تبقى مؤثرة والناس تفتكرها، دي أكتر حاجة تفرق معايا”.
واختتمت حديثها مؤكدة حبها للأداء البسيط بعيدًا عن المبالغة في الحوار، قائلة: “أنا بفرح جدًا بالمشاهد اللي مفيهاش كلام، ومبحبش الكلام الكتير، وبقعد أقولهم شيلوا الجملة دي ملهاش لازمة، وباتخانق على التفاصيل دي دايمًا”.
