محمد ثروت لـ”وشوشة”: كنا بنهزر أنا وانتصار بين المشاهد علشان نعرف نكمل قسوة الشخصية
كشف الفنان محمد ثروت عن كواليس شخصيته والأجواء التي كانت تسود التصوير، مؤكدًا أن طبيعة الأحداث الدرامية الثقيلة كانت تدفعه هو وزملاءه للجوء للكوميديا بين المشاهد لتخفيف التوتر.
وفي تصريح خاص لـ”وشوشة” تحدث محمد ثروت عن كواليس العمل، قائلًا: “كنا بهزر مع أستاذة انتصار بين المشاهد، لأن المفروض العيلة دي بتقطع بعض، فكنت أقولها هي العيلة دي واكلين بعض ليه؟ كيلو كباب وكفتة ويحلوا المشكلة وإحنا ننبسط، وكنا نحس إن المسلسل ضد طبيعتنا جوا”.
وتابع حديثه عن أصعب المشاهد التي واجهته أثناء التصوير، موضحًا: “المشاهد مع ريم كانت من أصعب الحاجات بالنسبالي، إني بخليها تنزل ترقص غصب عنها، وبطلقها من غير ما تعرف، وبقعد 3 شهور مش بلمسها ومتجوز عمتها، فكان في دربكة كبيرة في الشخصية”.
وأضاف: “كنا نهزر أنا وريم بين التصوير، وكنت أقولها طب هي باقية عليه كده حتى لو بتحبه؟ علشان نفرغ الطاقة الكوميدية شوية ونقدر ندخل نعمل المشاهد الثقيلة دي”.
كما أشار محمد ثروت إلى مشهد آخر يعتبره من أبرز مشاهد العمل، قائلًا: “كان في مشهد جميل جدًا مع العوضي قبل ما أشتري الكباريه، ورحمة بتغني الأغنية، وهو بيظهر وأقوله إن المكان ده كله هيبقى بتاعي، وده كان من مشاهد الماستر سين المهمة جدًا”.
وعن ردود الفعل التي فاجأته بعد عرض العمل، قال محمد ثروت: “أكتر حاجة مكنتش متوقعها موقف حصل في إشارة المرور، لما حد ناداني وقالي: علي كلاي تبعنا، والكلام ده كان لجلال درابوكا”.
