ندى بسيوني لـ"وشوشة": العيد عندنا هيصة وفرحة والمصريين بيتلككوا عشان يتبسطوا
تحرص الفنانة ندى بسيوني على الاستمتاع بأجواء عيد الأضحى وسط العائلة، مؤكدة أن العيد بالنسبة لها يحمل دائمًا حالة خاصة من البهجة والدفء، خاصة مع الذكريات المرتبطة بالتجمعات العائلية والسفر في المناسبات.
وتحدثت ندى بسيوني في تصريح خاص لـ"وشوشة" قائلة:"أنا بحب أجواء العيد الهادية، وزمان كان السفر أسهل، فكنا نسافر العين السخنة أو شرم الشيخ أو الغردقة أو إسكندرية، ودي كانت من أحلى الحاجات خصوصًا لما كانت والدتي عايشة، كنا بنسافر أنا وهي وبنتي ونقضي وقت جميل كعيلة".
ندى بسيوني عن اكتر حاجة مرتبطة بالعيد
وأضافت ندى بسيوني قائلة: “أكتر حاجة مرتبطة عندي بالعيد إن يبقى فيه أي حاجة جديدة حتى لو بسيطة، زي توكة شعر أو إكسسوار، أنا بحب الإحساس ده جدًا”.
وتابعت ندى بسيوني:"المصريين أصلًا شعب بيعشق البهجة، من أيام مصر القديمة وكل حاجة عندهم كان ليها عيد، وإحنا لحد دلوقتي بنتلكك عشان نفرح ونتبسط".
واختتمت ندى بسيوني حديثها قائلة: “العيد نفسه هو الفرحة، إننا نتجمع ونعمل أكلة حلوة أو خروجة بسيطة، وكل واحد يعمل الحاجة اللي بيحبها، اللي بيلعب طاولة واللي بيتفرج على فيلم واللي بيسمع مزيكا، المهم إن العيد عندنا دايمًا هيصة وفرحة”.
