سمية درويش لـ"وشوشة": “النجاح الحقيقي من الناس مش التريند.. وربنا عوضني بعد الصبر”

تحدثت المطربة سمية درويش عن رسائل أغنيتها الجديدة وكواليس عودتها بعد فترة غياب، كما كشفت موقفها من فكرة التريند ورد فعل الجمهور على أعمالها.

وفي تصريح خاص لـ"وشوشة" تحدثت سمية درويش عن الرسالة التي أرادت توجيهها من خلال الأغنية، قائلة: “هي بتكلم عني لأن أنا فعلا أنا الإنسان الي بعيد عن الحسد والغل والحقد على الغير وربنا عمل معايا معجزات كتيره أنا اتظلمت في حاجات ربنا عوضهالي لإن أنا سكت وصبرت حسيت انها بتوصف حاجة جوايا، ورسالة لكل حاقد وحسود كل الي انت بتعمله مهما طول معاك انك نجحت في الغل على غيرك آخرتك مش حلوة.”

وتابعت حديثها عن عودتها بعد الغياب واختيارها طرح الأغنية ضمن ألبوم جديد: “دايما الفنان وهو غايب يحب يختار حاجة قوية يرجع بيها وأنا مؤمنة بالشيئ ف ده بيخليني مصرة اكتر، ثانيًا دي جوا ألبوم ولسه أنا بنزل وفي أغاني هتنزل لسه، أنا عامله شوية أغاني نكد الي الناس مستنياه موجود already بس أنا نزلت الي في الأول الي عايزة أشوف من الناس الـfeed back فيه".

وأضافت عن علاقتها بفكرة التريند والسوشيال ميديا: “أنا مهتمية باللغه انتي ناجحة يعني انتي تريند اه لكن معندي الهوس اني اطلع تريند، زي ما قولتلك ‘ادعيلي ياما’ مكنتش تريند بس الناس وانا ماشية في الشارع يقولوا ادعيلي ياما شكرًا دي الحقيقة، هو ده حد دافعله ولا أنا دافعة علشان أوصله؟ لا أنا دفعت علشان أوصل للإنسان ده على موبايله ولا حد دافعله علشان يقول كده ده في الشارع".

واستكملت حديثها عن نجاح الأغاني ورد فعل الجمهور: “وفي الحفلة لما ألاقي صغير وكبير وكله بيغني ادعيلي ياما مع إن المزيكا جديدة والتكنو بطبيعته مفهوش غنا، محدش مستوعب إن تراك الغنوة هو مزيكا والصوت عليه بسيط أوي، أنا يهمني الـfeed back من الشارع يعني أنا عندي أغاني بقالها عشرين سنة طالعة تريند دلوقتي بدون مجهود بيفرحني مين اللي عملها؟ أنا لا، إنما الناس هي السبب في ده، الناس هي اللي مطلعة عيد حساباتك تريند والناس هي اللي مطلعة قلب وراح تريند وهي اللي مطلعة ليالي وغربتنا تريند، الحمدلله ده بفضل ربنا، لما يكون الإنسان جواه حلو وبيصبر على الظلم ربنا بيديه".