لينا صوفيا لـ"وشوشة": خوفت من كره جمهور ياسمين عبد العزيز ليا.. ونجاح يارا أكبر دليل
في خطوة لافتة ضمن موسم دراما رمضان، خطفت الفنانة الشابة لينا صوفيا الأنظار من خلال دورها في أحد الأعمال التي أثارت تفاعلًا واسعًا، حيث استطاعت أن تترك بصمة واضحة رغم قلقها قبل المشاركة، خاصة مع اقتراب انتهاء فترة اختيار فريق العمل وشعورها آنذاك بأن الفرص قد نفدت.
وتحدثت لينا صوفيا في تصريح خاص لـ"وشوشة"، قائلة:"السيناريو كله مكنش مكتوب، بس أنا اتعرض عليا دور يارا، وأول حاجة شدتني جدًا إن دي بنت ياسمين عبد العزيز، ودي طبعًا حاجة كبيرة جدًا بالنسبة لي كنا في أواخر وقت تسكين الممثلين، وكنت خايفة جدًا إني مش همثل في رمضان، محدش كلمني وكنت حاسة إن في حاجة غلط، وفجأة لقيتهم بيكلموني، طبعًا كنت مبسوطة جدًا جدًا".
وتابعت لينا صوفيا حديثها قائلة:"وأظن دي أول مرة تعمل دور مامت بنت شابة مش صغيرة، وأنا مندمتش لحظة إني اشتغلت في المسلسل ده".
وأضافت لينا صوفيا قائلة: "أنا بصيت على الدور، ومبيفرقليش قد إيه أنا موجودة في الحكاية، قد ما بيفرقلي قد إيه وجودي مؤثر فيها ودور بنتها أكيد له أهمية كبيرة، خصوصًا إن الشخصية فيها أبعاد كتير، بنت اتنين مطلقين وضحية علاقة مش كويسة بين مامتها وباباها، وعاشت طول عمرها من غير مامتها فحاسّة بنقص".
وأردفت لينا صوفيا قائلة:"أول ما الأستاذ عمرو محمود ياسين شرحلي الشخصية حسيت إنه بيتكلم عن بنت حقيقية هو عارفها، وده خلاني أتحمس جدًا، رغم إني كنت خايفة شوية لأنهم قالولي خلي بالك الدور صعب، خصوصًا إن عندي مشاهد قوية مع أستاذة ياسمين عبد العزيز، لكن الأهم عندي إن المشاهد تكون مؤثرة".
لينا صوفيا عن رد فعل الجمهور
وعن ردود فعل الجمهور، اختتمت حديثها قائلة:"كنت خايفة جدًا من رد فعل جمهور ياسمين عبد العزيز، عشان أنا عارفة هما بيحبّوها قد إيه وبيزعلوا من أي حد بيأذيها في المسلسلات كنت متوقعة ده، ولما حصل زعلت شوية، حسيت إن في ناس مش قادرة تفرق بيني وبين الشخصية، بس أنا أصلًا معاهم! أنا نفسي يشتموا يارا عادي جدًا، ده معناه إني نجحت في الدور والحمد لله بقيت أقابل ناس في الحقيقة بتقولي قد إيه الشخصية مستفزة، وده بالنسبالي أحسن رد فعل ممكن".
