طارق الدسوقي لـ"وشوشة": حق أي فنان يقول أنا رقم واحد والجمهور هو الحكم
تحدث الفنان طارق الدسوقي في تصريح خاص لـ"وشوشة" عن فكرة تصدر بعض الفنانين والفنانات لقب رقم واحد في الوسط الفني، مؤكدًا أن الأمر يرتبط بشكل كبير بأساليب الدعاية والتسويق وليس معيارًا حقيقيًا للحكم على النجاح الفني.
رأيه في لقب "رقم واحد"
قال طارق الدسوقي: "أولاً، ده نقدر نقول عليه أسلوب من أساليب الدعاية والتسويق، وعلى فكرة ده حق مشروع، حتى مش بس في المجال الفني، في أي مجال في الدنيا".
وتابع طارق الدسوقي حديثه قائلاً:"أي حد بيبيع سلعة أو منتج معين أو بيروج لكومباوند أو أي حاجة، بيعمل ماركتينج ليها، طبيعي إنه يقول أنا أفضل حد في الحياة المكان ده أفضل حاجة المنتج ده نمرة واحد ده شيء طبيعي جدًا أي فنان أو فنانة يقول أنا أفضل حد في الوجود أو أنا الأعلى أجرًا أو نمرة واحد، ده شيء مشروع".
وأضاف طارق الدسوقي:"في النهاية، الحكم الحقيقي هيكون من الجمهور ومن أجهزة الرصد اللي بتراقب الأرقام بشكل فعلي، وتقول مين المسلسل الأكبر مشاهدة، مين الأعلى أجر، مين أنجح مسلسل وهكذا".
واستكمل قائلاً:"ده كله حقائق عملية وواقعية، لكن أي حد يقول ‘أعتقد أني الأفضل ده حق مشروع كنوع من أنواع الدعاية للعمل بتاعه ولنفسه، وده شيء طبيعي.”
موقفه من فكرة الظلم الفني
وأضاف طارق الدسوقي حول مسألة تعرضه للظلم الفني: “مبحبش كلمة اتظلمت، لأني مقتنع ومؤمن تمامًا بأن ربنا سبحانه وتعالى دايمًا بيختار للبني آدم أفضل شيء".
واختتم طارق الدسوقي قائلاً:"ممكن أكون بتمنى أن أعمل عمل وأحبه جدًا وما يحصلش، فجايز ربنا ريدلي خير وأخلي لي عمل أفضل، يبقى أحسن أنا دايمًا مؤمن بالحكاية دي، إن الرزق بتاع ربنا، وإن ربنا بيختار للبني آدم أفضل شيء في الدنيا، فالحكاية مفيهاش في النهاية ظلم لأي حد".
