درة: شخصية ميادة في"علي كلاي" مختلفة وجذابة وأستمتع بتقديم الأدوار المركبة

قالت الفنانة درة إنها سعيدة للغاية بدورها في مسلسل “علي كلاي”، مؤكدة أن شخصية ميادة لفتت الأنظار حتى قبل عرض الحلقة الأولى، ومع عرضها جاءت ردود الفعل لطيفة ومشجعة للغاية.

وأضافت درة، خلال مداخلة هاتفية لها في برنامج “إحنا لبعض” المذاع عبر شاشة “صدى البلد”: “أنا مش أول مرة أقدم دور الفتاة الشعبية، وقدمت شخصيات مشابهة قبل كده ونجحت معايا جدًا، وبحب النوع ده من الأدوار لأنها قريبة من الناس وبتعمل تفاعل قوي مع الجمهور”.

وتابعت: “بحاول دايمًا يكون كل دور أقدمه مختلف عن اللي قبله، وحاسة إن شخصية ميادة مختلفة عن كل الأدوار الشعبية اللي قدمتها قبل كده، لأنها تركيبة معقدة، معلمة وبتحب جوزها حب شديد لدرجة ممكن يكون مؤذي”.

وأشارت إلى أن شخصية “ميادة” بعيدة تمامًا عن شخصيتها الحقيقية، قائلة: “أنا هادية ومش شبهها خالص، لكن بستمتع جدًا بتقديم الشخصيات اللي بعيدة عني والمركبة، بحس إني شخص تاني خالص”.

وعن تحضيراتها للشخصية، أوضحت درة: “بحب أتفرج كتير على الأعمال وأتعلم منها، ولما بييجي لي دور جديد بشوف الشخصيات القريبة منه وبذاكرها، وكمان برصد الواقع علشان ما يكونش أسلوب التقديم تقليدي أو قديم، لازم نلقط من الناس ونتعلم منهم علشان يطلع الدور صادق وطبيعي”.