ريهام الشنواني لـ"وشوشة": فخورة بالعمل مع ياسر جلال في كلهم بيحبوا مودي

أعربت الفنانة ريهام الشنواني عن سعادتها بالمشاركة في مسلسل كلهم بيحبوا مودي بطولة الفنان ياسر جلال، ومن المقرر أن يتم عرضه في موسم رمضان المقبل عبر قناة ON، مؤكدة أن العمل تجربة مميزة على المستوى الفني والإنساني بالنسبة لها.

وتحدثت ريهام الشنواني في تصريح خاص لـ"وشوشة"، قائلة: "دوري في مسلسل “كلهم بيحبوا مودي” أنا طالعة أميرة، وهي الصديقة المقربة لمودي والانتيم يعني، ومع التفاصيل بقى مش عايزة أحرق، أنا الصديقة المقربة لمصطفى أبو سريع ولمودي، ومع الحلقات هنكتشف حاجات تانية كتير قوي، فمش عايزة أحرق".

وأضافت ريهام الشنواني قائلة: "بصراحة أنا مش عارفة مين اللي رشحني للدور، لكن أعتقد الأستاذ أحمد شفيق والمنتجة أستاذة مها سليم، وأعتقد إنهم هما الاتنين اتفقوا على الترشيح".

وعن أكثر ما جذبها للمشاركة في العمل، أوضحت ريهام الشنواني قائلة: "طبعًا إن أنا أشتغل مع أستاذ ياسر جلال، دي أكتر حاجة شجعتني. وكمان مصطفى أبو سريع، هو إسكندراني زيي فإحنا بنفهم بعض، وأنا بحبه على المستوى الشخصي والإنساني، وعمري ما اشتغلت معاه قبل كده، فكنت نفسي أشتغل مع الاتنين، وطبعًا أستاذة ميرفت أمين، إن أنا أقف معاها في كادر واحد دي قيمة وقامة كبيرة".

وتابعت ريهام الشنواني قائلة: "كل الناس في العمل أول مرة أشتغل معاهم ما عدا آيتن عامر  اشتغلت معاها مسرح قبل كده، لكن أكتر حد كان بالنسبالي أستاذ ياسر ومصطفى أبو سريع، خصوصًا إن دوري كله معاهم".

وعن كواليس التصوير، قالت ريهام الشنواني: "الكواليس كانت لطيفة جدًا، كلها ضحك وهزار، وكنت بحب اليوم اللي مصطفى بيبقى فيه معايا في التصوير لأنه بيبقى كله هزار أستاذ ياسر جلال على المستوى الإنساني إنسان جميل وخدوم ولبق ومبيحبش يزعل حد، وده بمنتهى الأمانة مش كلام جرايد، هو فعلًا كده من أصغر حد لأكبر حد، بيجبر بخاطر الناس، ودي حاجة جديدة عليا لأني ما اشتغلتش معاه قبل كده. وكمان دمه خفيف جدًا، فالمشاهد اللي كانت بيني وبينه هو ومصطفى كنت بحبها قوي".

وأشارت ريهام الشنواني  إلى أنها لم تجمعها مشاهد مع آيتن عامر في المسلسل، مضيفة: "المسلسل لايت وكواليسه خفيفة، تجربة حلوة ومريحة".

وعن الرسالة التي يقدمها العمل، قالت ريهام الشنواني : "من وجهة نظري إن الرسالة إن الراجل يلم نفسه، وإن امرأة واحدة تكفي".

ووجهت  ريهام الشنواني رسالة لأبطال العمل قائلة: "أستاذ ياسر أنا فخورة إني اشتغلت معاه واكتسبت زميل وصديق جديد، ومصطفى أبو سريع أوجه له كل حاجة حلوة وأقول له إني اكتسبت صديق جديد، وكنت نفسي أشتغل معاه جدًا".

واختتمت ريهام الشنواني حديثها قائلة :"وأنا بحب الناس الإسكندرانية زيي وآيتن عامر أعرفها من زمان وهي جميلة جدًا، وكنت حابة يبقى في مشاهد أكتر بينا وهدى الأتربي جميلة جدًا وعلى المستوى الشخصي عسولة وكيوت، حتى لو ما كانش بينا غير مشهد واحد".

أبطال مسلسل “كلهم بيحبوا مودي”

يشارك في العمل مجموعة كبيرة من النجوم بجانب ياسر جلال، من بينهم أيتن عامر، ميرفت أمين، مصطفى أبو سريع، هدى الأتربي، جوري بكر، ريهام الشنواني، يمنى طولان، جودي مسعود، سلوى عثمان، ومحسن منصور، وأيمن عزب، أحمد محارب، إضافة إلى إيرينا يسري ملكة جمال مصر 2025.

والمسلسل من تأليف أيمن سلامة وإخراج أحمد شفيق، ويعتمد على كوميديا خفيفة تمزج بين الحياة الاجتماعية والمواقف الطريفة اليومية.

قصة مسلسل “كلهم بيحبوا مودي”

تدور أحداث المسلسل حول شخصية محمود الوكيل التي يجسدها ياسر جلال، وهو رجل أعمال مدلل تعود على حياة الرفاهية والملذات والزيجات المتعددة.

ومع مرور الوقت، يتعرض لخسائر مالية كبيرة تؤدي إلى وقوعه في سلسلة من الفضائح، ما يدفعه للبحث عن طريقة للإنقاذ.

وفي سبيل ذلك، يقرر الزواج من سيدة غنية من طبقة شعبية، لتتعلم الشخصية معنى الحب الحقيقي والقيم العائلية وسط عالم يهيمن عليه المال والمصالح.