محمد قماح لـ"وشوشة": "مشينا" بداية انتصار جديدة بعد سنوات من الخبرة والتجارب
كشف الملحن والمنتج محمد القماح عن كواليس تعاونه مع الشاعر محمد السوكني في أغنية للفنان محمد نور، كما تحدث عن تفاصيل ألبومه الجديد "مشينا" الذي يعتبره مرحلة جديدة وبداية انتصار بعد سنوات من الخبرات والتجارب المختلفة في مشواره الفني.
محمد القماح يشيد بكلمات محمد السوكني
قال محمد القماح في تصريح خاص لـ”وشوشة”: “كلمات محمد السوكني عمل معايا أغنية محمد نور، هو في كده بأمانة برضه كسرت الدنيا الشاعر ده عنده ميزة إنه مش مصري، هو ليبي، بس بيكتب مصري بطريقة مختلفة فعجبتني جدًا عنده كلمة "الورشة اللي تكسر يتصلح" دي كلمة بنقولها في الورشة وعاجبني المطلع ده، حسيت إنه لو اتلحن بطريقة واتعمله مزيكا مقسوم هيطلع حلو جدًا، وحسيتها كلمة جديدة ومختلفة”.
ألبوم "مشينا" بداية انتصار جديدة
وتحدث محمد القماح عن ألبومه الجديد "مشينا" مؤكدًا أنه يمثل نقطة تحول في مسيرته الفنية، حيث قال:
“ألبوم مشينا يعتبر بداية الانتصار، الفترة الجاية ناوي أعوض المرحلة اللي فاتتني، لأن أنا كان عندي تجربة في بداية حياتي ما توفقتش فيها مع شركة إنتاج، وللأسف مكنش عندي خبرة وأنا صغير”.
خبرات الإنتاج تصنع الفارق
وأوضح محمد القماح أن خبرته الحالية ساعدته على فهم تفاصيل الإنتاج الموسيقي بشكل أعمق، قائلًا:
“الفترة الجاية بعتمد على الخبرة وبادور أفهم حاجات كتير في الإنتاج، لأن زمان مكنش عندي خبرة كافية، وخاصة إن الإنتاج حاجة كبيرة جدًا، ومش أي حد يعرف ينتج. لازم الواحد يبقى عنده خبرة إزاي تنتج من أغنية وتكسب من المزيكا، لأن لو ما كسبتش منها هتقعد في البيت، ومفيش تعلم ببلاش”.
"مشينا" خلاصة تجارب ومحطات
وأكد محمد القماح أن ألبوم "مشينا" جاء بعد سنوات من الفهم والتجارب، موضحًا:
“في ألبوم مشينا ده انتصار بعد فهم وتجارب كتير، وفيه مرحلة محمد قماح. وأنا مقسم نفسي لأربع حاجات: ملحن، ومنتج، وموزع، ومغني بالنسبة لي المغني هاهتم بيه جدًا الفترة الجاية، لأن الحاجات التانية حققت فيها بشكل كويس”.
القماح: عايز آخد مكاني كمغني
واختتم حديثه بالتأكيد على رغبته في التركيز أكثر على الغناء خلال المرحلة المقبلة، قائلًا:
“أنا برضه مغني، بس عايز أدي لنفسي حقها شوية، وآخد مكانتي عند الناس اللي حابّة تشوفني كمغني”.
تفاصيل ألبوم “مشينا”
وأشار محمد القماح إلى أن الألبوم يضم 10 أغنيات، مؤكدًا حبه الكبير لاسم الألبوم، حيث قال:
“الألبوم بيضم 10 أغاني، وأنا عاجبني كلمة مشينا، حاسس إن الكلمة معناها ماشيين ومكملين”.