حازم سمير يكشف أغرب موقف واجهه أثناء التصوير: "كنت حموت"

كشف الفنان حازم سمير عن أغرب موقف واجهه في حياته، وذلك أثناء تصويره لأحد المشاهد.

وخلال السطور التالية، يرصد لكم موقع “وشوشة” أبرز تصريحاته خلال استضافته في بودكاست “ستوري بالعربي”.

مشهد قفز من الدور الثاني

أوضح الفنان حازم سمير أن أغرب موقف واجهه أثناء تصوير أحد المسلسلات كان مشهدًا من المفترض أن يقفز فيه من الدور الثاني إلى الأرض.

وتابع: “طبعا أنا قلت تمام، هنط من الدور الثاني، بلكونة مش عالية قوي، قلت أكيد في واير، في حد ممكن ينط مكاني، يعني أنا عديت المشهد ده وقلت أكيد مش هيبقى في خطر”.

صدمة وغياب وسائل الأمان

واستكمل: “لقيت المخرج بيقول لي: “لا، إنت اللي هتنط، وما فيش واير”، قلت طيب تمام، هي مش عالية قوي، طيب هتحطوا إيه عشان أنط عليه، أكيد هتحطوا مرتبة في الأرض لقيته بيقول لي: “آه، هنحط حاجة، قطع كرتون ونحطها في الأرض علشان تنط عليها””.

وأضاف: “وأنا واقف بتفرج، المهم لما لقيت إن الوضع كده قلت له: لا، مش هنط، قال لي: إنت خايف ولا إيه؟ ودخل معايا في الكلام من طريق إنه عايز يحرجني”.

“أيوه أنا خايف”

وأشار حازم سمير إلى أنه ردّ عليه قائلًا: “آه، أنا خايف طبعا، ولا أنا ماليش دعوة، مش هعمل الدور ده”.

وتابع: “جابوا حد ينط مكاني، وأنا رفضت أبدأ إني أنط”.

النهاية المؤلمة للمشهد

وختم الفنان حازم سمير حديثه، مشيرًا إلى أنه في أول لقطة من هذا المشهد، الدوبلير الذي صور المشهد بدلا منه أُصيب بكسر في يده ورجله.