"لحد النهارده بيقولوا إني رخيص".. بيومي فؤاد يعتذر لـ محمد سلام

قدم الفنان بيومي فؤاد اعتذارًا رسميًا للفنان محمد سلام بعد مرور عامين على الخلاف الذي نشب بينهما، مؤكدًا تحمله الكامل لمسؤوليته عما بدر منه، ومعربًا عن ندمه الشديد على الفيديو الذي تسبب في سوء الفهم لدى الجمهور.
وخلال السطور التالية ينقل لكم موقع وشوشة أبرز تصريحاته خلال إستضافته في بودكاست "شقة التعاون" مع حسام داغر، المذاع عبر موقع التواصل الإجتماعي يوتيوب.

بيومي فؤاد: أنا غلطت والناس بتحكم باللي ظاهر

وقال بيومي فؤاد خلال تصريحاته:"أنا غلطت في الفيديو بتاعي، والناس مالهاش غير الظاهر، ومحدش يعرف الكواليس، واللي باين للناس إني ببيع صاحبي".
 

وأضاف: "مش بقول الكلام ده علشان الناس ترحمني، ولسه لغاية دلوقتي في ناس بتقول عليّ بيومي فؤاد رخيص، وأنا والله لا بقرأ ده ولا ده، ومعنديش سوشيال ميديا خالص".

وأوضح بيومي أنه طلب من القائمين على حساباته إغلاق جميع صفحات التواصل الاجتماعي بعد الأزمة، قائلًا: "بعد اللي حصل طلبت من الشباب اللي ماسكين الفيسبوك يقفلوا كل السوشيال ميديا".

وتابع: "اكتشفت إن الفيسبوك كان مفتوح من برا مصر، ومكنتش فاهم يعني إيه الكلام ده، ولما عاتبتهم لقيت إن في بيوت مفتوحة و4 أو 5 عيال بياخدوا فلوس شهري".

أخطاء وإدارة دون علمه

وأشار إلى أنه سمح لهم بالنشر دون تدخله، بشرط المتابعة مع زوجته في الحالات الإنسانية، موضحًا: "قلت لهم اعملوا اللي أنتم عايزينه، بس تابعوا مع المدام أي حد يتوفى تبعتوا له، لأنها اكتشفت إن "إنا لله وإنا إليه راجعون" كانوا بيكتبوها غلط".
وأضاف مؤكدًا: "والله ما معايا أرقامهم دلوقتي، ولا بشوف حاجة ولا بعمل حاجة".

ندم شديد على الفيديو

وتساءل بيومي فؤاد بحسرة: "الكلام ده قولته قبل كده، والناس مالهاش غير الظاهر، والظاهر إني لو شفت الفيديو بتاعي دلوقتي بقرف ومش عايز أشوفه، بس مبرره إيه؟".

تفاصيل الاعتذار بينه وبين محمد سلام

وكشف بيومي فؤاد تفاصيل ما دار بينه وبين محمد سلام، قائلًا: "إنت اعتذرت في التليفون، وإحنا قبلنا الاعتذار من أول مرة وتاني مرة وتالت مرة، وإنت حبيبي وأنا حبيبك".

وتابع: "قلت لك مش عايز حاجة من السعودية، وإنت قلت لي لا يا حبيبي، وطلبت منك ترشيح، وقلت لي هات أي حد من مسرح مصر".

سبب نشر الفيديو المثير للجدل

وأضاف: "الناس طلبوا مني ألحق الفيديو اللي اتنشر، وأنا مكنتش شوفته، ولما بعتوه لي كنت لسه بتفرج عليه، ولقيت فنانين بيبعتوا لي: الحق، الحق لأنهم بيعتبروني ولي أمره".

وأوضح سبب تدخل الجمهور، قائلًا: "عشان أنا ولي أمره، والناس ما تعرفش إني كلمته في التليفون ولا تعرف إني في المسرحية".

المطالبة بحذف الفيديو

واختتم بيومي فؤاد حديثه قائلًا: "كلمته وقلت له: إنت اعتذرت وإحنا قبلنا الاعتذار يا سلام، بس ارفع الفيديو ده، قال لي لأول مرة هقول لك آسف، قلت له براحتك يا ابني".
وأكد في ختام حديثه: "أنا آخر واحد في الدنيا ممكن يتخيل تأثير الحاجات دي على البشر، وبقوله أنا آسف لو لسه زعلان مني".

أصل الخلاف بين بيومي فؤاد ومحمد سلام

ويعود هذا الخلاف إلى عامين ماضيين، عندما نشر الفنان محمد سلام، فيديو عبر صفحاته الرسمية على مواقع التواصل الإجتماعي، ليعتذر فيه عن الظهور وتقديم المسرحيات في موسم الرياض، وفي الجانب الآخر هناك حرب إبادة جماعية في غرة، مؤكدًا أنه لن يقدر على تقديم مسرحية كوميدية تضحك الجمهور وإخوانه يعانون من حرب إبادة جماعية وتجويع.

وفور نشر الفيديو أثار حالة من الجدل الواسع على منصات التواصل الإجتماعي، وزعم رواد بعض الصفحات أن هذا الكلام قد يكون موجه لشخص بعينه.

وبعد عرض المسرحية في موسم الرياض بالسعودية، ألقى الفنان بيومي فؤاد كلمة، وصفها الآن بأنها غير لائقه، ومن ثَم انهالت عليه تعليقات سلبيه من رواد التواصل الإجتماعي الذين وصفوه “بالخائن الرخيص” وظل لفترة طويلة يعاني من الإنتقادات والتعليقات السلبية.