بشرى: نجوم كتير زعلوا مني بسبب مهرجان الجونة

أثارت الفنانة بشرى جدلًا واسعًا، بعدما تحدثت بصراحة عن النجوم الذين اتخذوا موقفًا منها خلال فترة عملها كإحدى المسؤولات عن مهرجان الجونة السينمائي الدولي، مؤكدة أنها تعرضت لسوء فهم كبير واتهمت بأشياء لم تكن مسؤولة عنها.
وخلال استضافتها في برنامج "ابن كارك" مع الإعلامي كريم خطاب، المذاع عبر موقع التواصل الاجتماعي يوتيوب، كشفت بشرى كواليس تلك المرحلة الشائكة من حياتها.

"كانوا شايفين إني السبب".. سوء فهم بسبب الدعوات

وقالت بشرى:"كان في ناس كتير جدًا بتاخد موقف مني لما كنت واحدة من المسؤولين عن مهرجان الجونة السينمائي الدولي، لأن كان في نجوم كتير مش بيتعزموا".

وأضافت:"الناس دي كانت شايفة إن أنا اللي ما عزمتهمش، مع إن أنا ما كنتش المسؤولة الأولى والأخيرة، لا، كان معايا ناس تانية، وكان في آراء مختلفة، وأنا مش اللي بقول مين يتعزم ومين ما يتعزمش".

زعل وصدمات مباشرة

وتابعت بشرى حديثها كاشفة عن حجم الضغوط التي تعرضت لها:"كنت بلاقي إن في نجوم كتير واخدين موقف مني وزعلانين، وأنا بجد ما كنتش ببقى عارفة هم زعلانين مني ليه".

وأضافت:"كان في ناس لما بتقابلني بتقولي بلطف، وناس لا، وناس كانت بتصدمني فعلًا".

بعد رحيلي عن الجونة.. الحقيقة ظهرت

وأوضحت بشرى أنها بعد مغادرتها العمل التنظيمي بالمهرجان، ابتعدت تمامًا عن أي دور إداري:"بعد ما مشيت من مهرجان الجونة، قعدت تلات سنين ما ليش أي دعوة بالتنظيم خالص".

وتابعت:"كنت موجودة كواحدة من المؤسسين بس، بصفة معنوية مش مادية".

وأضافت مؤكدة:"ولما لقوا إن الناس اللي ما كانتش بتتعزم لسه زي ما هي، ومحدش بيعزمها برضه، عرفوا إن دي مش مشكلة بشرى".

شخصان فقط ما زال الخلاف قائمًا معهما

وفي سياق متصل، كشفت النجمة بشرى أنها خلال مشوارها الطويل في الوسط الفني، لا تزال تأخذ موقفًا من شخصين فقط حتى الآن.
وقالت:"كان في علاقات ما بينا وبقت أسوأ، وأنا حاولت أصلحها، وفي ناس تانية حاولت تتوسط، لكن ما عرفتش".

"مش هاجبر حد يحبني".. قرار حاسم

واختتمت النجمة بشرى حديثها برسالة قوية تعكس نضجها وتصالحها مع نفسها، قائلة:"أنا دلوقتي وصلت لنقطة إني بحترم نفسي جدًا، واقتنعت إنك ما تقدرش تجبر الناس إنهم يحبوك غصب عنهم".