محمد علي رزق يهاجم "تريند مسح الأغاني": "ربنا ما بيتضحكش عليه"
كشف الفنان الشاب محمد علي رزق عن كرهه الشديد للصراعات التي تدور على مواقع التواصل الاجتماعي، مؤكدًا أنه شخص لا يهتم بإثارة الجدل، وذلك ردًا على موضوع الفنان الذي طلب من الناس أن يمسحوا جميع أغانيه بعد وفاته معتبرًا الفن حرامًا.
وخلال السطور التالية ينقل لكم موقع "وشوشة" أبرز تصريحاته خلال استضافته في بودكاست "بوب كورنر" الذي تقدمه الفنانة هبة عبد الغني والمذاع عبر موقع “يوتيوب”.
توضيح موقفه من حديثه عن الفنان الراحل
وقال محمد علي رزق: "أنا رديت، لكن أنا عايز أوضح حاجة أنا ما أقصدش المطرب اللي مات، أنا عمري ما هجيب سيرة حد توفى، لأنه في دار حق، أنا بتكلم دلوقتي على المطربين اللي عايشين دلوقتي، الراجل ده قال" أنا بعد ما أموت وصيتي إنكم تشيلوا الأغاني بتاعتي من على النت، تمام ربنا يرحمه ويسامحه، ويجعله من أهل الجنة".
وتابع: "أنا بتكلم على اللي عايشين وطلعوا بعديه وقالوا أنا كمان، طب ما أنت دلوقتي عايش، قدامك فرصة تعمل كده وتغيّر مصيرك وتمسح أغانيك".
انتقاد "تريند" إعلان التوبة بعد الموت
وأضاف رزق: "يعني أنت دلوقتي حسيت إن شغلتك حرام، وهتفضل تكمل غنا وتعمل مشاهدات وتكسب فلوس، وفي الآخر تقول لما أموت امسحوا الأغاني بتاعتي، ربنا ما بيضحكش عليه يا جماعة، أنا كلامي كان مقصود بيه المطربين اللي عايشين".
الدعاء للفنان الراحل وتوضيح النية
وتابع قائلًا: "لكن الفنان المتوفى ربنا يرحمه، ومن الواضح إن نيته كانت كويسة، وربنا يرحمنا كلنا، لأن ربنا أرحم وألطف مننا كلنا، الحمد لله فعلًا إن الرحمة والمغفرة بإيد ربنا مش بإيد البشر، لأن إحنا ناس قاسية على بعض جدًا".
رسالة مباشرة للمطربين الأحياء
ووجه رسالة قوية قائلًا: "يعني أنت يا اللي عايش عارف إنك بتعمل حاجة حرام، وهتتربح من حرام، وتعمل حفلات وتكسب فلوس حرام، وتحضر أفراح وتكسب فلوس حرام، وتاكل من الفلوس دي، وتركب عربية من الحرام ولما تموت تيجي تقول امسحوا الأغاني ليه؟ هو ربنا بيتضحك عليه؟".
خاتمة وتصحيح الاتهامات
واختتم الفنان الشاب حديثه قائلًا: "هو ده كان قصدي، لكن هما لبسوني مشكلة إني بجيب سيرة المطرب اللي مات لكن ده مش حقيقي، هو في دار حق دلوقتي، ومش هجيب سيرته".