محمد رضوان يكشف كواليس شخصية "رمضان حريقة" في مسلسل موضوع عائلي

كشف الفنان محمد رضوان عن كواليس تجسيده لشخصية رمضان حريقة في مسلسل موضوع عائلي.
وخلال السطور التالية ينقل لكم موقع وشوشة أبرز تصريحاته خلال إستضافته في برنامج "فضفضت اوي" مع الإعلامي معتز التوني، المذاع عبر على منصة"watch it".

كواليس التحضير

وأوضح رضوان أنه تحدث كثيراً مع المخرج أحمد الجندي قبل الإتفاق على هذا العمل، حتى نسوا التحدث عن العمل نفسه، قائلاً:"قعدنا نتكلم كتير جداً في الفن وفي الكوميديا وفي الحياة، واكتشفنا إننا قعدنا مع بعض نتكلم كتير وماتكلمناش أصلا عن الدور، وفي الآخر قالي: روح امضي… واقنعني فعلاً إني أمضي على دور رمضان حريقة في مسلسل موضوع عائلي."

اللوكيشن.. بيت ثاني لرضوان

وأشار الفنان محمد رضوان إلى أنه شعر براحة كبيرة داخل ديكور تصوير المسلسل، حتى أحس أنه منزله الحقيقي:"بعد يومين حسيت اللوكيشن ده كأنه بيتي… ودور رمضان حريقة كان جميل جداً، وكمان حلو إنك تقعد تضيف من رأيك ومن وجهة نظرك للشخصية، مع إن ده بيحتاج إن صاحب الشخصية والمخرج يكونوا قريبين ومستعدين لكده."

وأضاف أن العلاقة الفنية بينه وبين المخرج الجندي تطورت بسرعة، رغم أنه لم يكن يعرفه جيداً في البداية.

المخرج أحمد الجندي ودعم الإضافات الفنية

وأكد رضوان أنه لم يتوقع أن يوافق المخرج على الإضافات التي اقترحها للشخصية، لكن النتيجة كانت رائعة:"جيت لقيت الجندي بيقولي إنه موافق إني أضيف حاجات للشخصية… وقالي: قول اللي انت عايزه وإحنا في الآخر هنكرر… وكان شخص متفهم فعلاً."

كما أوضح أن المخرج أحمد الجندي يتميز بروح طيبة وتشجيع واضح للفنانين:"حتى لو حد قال جملة هو مش عايزها، بيضحك ويقول الجملة مش في مكانها، وبيقترح نحطها في مشهد تاني… هو مخرج موهوب، وحتى نصايحه مش قاسية، وده يشجع الفنان إنه يضيف أكتر وأكتر."

روح جماعية صنعت نجاح المسلسل

واختم الفنان محمد رضوان حديثه مؤكداً أن جميع المشاركين في مسلسل موضوع عائلي كانوا رائعين ومتفاهمين ومشجعين لبعضهم داخل اللوكيشن.

وقال:"من أول التصوير الفوتوغرافي للمسلسل، أنا وسما بقينا عايشين جوه زينب ورمضان… وبنتعامل فعلاً على الأساس ده، وعلى إن دول ولادنا… وإننا أسرة… وده اللي عمل الأجواء اللي الجمهور حبها وخلى المسلسل ينجح بالشكل اللي ظهر بيه، لأن كل الصناع حبو العمل ده وكانوا عايزينه يظهر في أحسن شكل"