كريم العمري يكشف لـ"وشوشة" كواليس أصعب أدواره في "2 قهوة"
يشهد مسلسل "2 قهوة" حالة من الاهتمام المتزايد قبل عرضه، خاصة بعد الكشف عن أبطال العمل والشخصيات التي يقدمها كل منهم، ومن بينهم الفنان كريم العمري الذي يخوض من خلاله تجربة تمثيلية مختلفة تمامًا عن أعماله السابقة.
وقال الفنان كريم العمري في تصريح لـ"وشوشة": “المسلسل اتعرض عليا من خلال أستاذ أحمد عبد العاطي، واللي قدم لي الدور هو أستاذ عمرو محمود ياسين، وهو الداعم الأول ليا في مشواري اللي شدني للدور إن الشخصية مختلفة تمامًا عن أي حاجة قدمتها قبل كدة، هي شخصية بعيدة كل البعد عني، وده كان تحدي كبير ليا اشتغلت عليها مع الدكتور فريد النقراشي بطريقة جديدة وصعبة عليّ شوية، لكن كانت مهمة جدًا في تجربتي".
وتابع كريم: "الشخصية بصراحة معقدة ومركبة، ودة احتاج مني مجهود كبير جدًا في التحضير والمذاكرة كنت برجع لبيتي في الأول ومع إخواتي اللي بحس معاهم بالراحة، ودة ساعدني أرجع لروحي وأشتغل على تفاصيل الشخصية".
واستطرد: "كمان كان فيه دعم كبير جدًا من أستاذ أحمد عبد العاطي وطقم الإنتاج كله، أنا بعتبرهم عيلتي، عمري ما حسّيت إن في أي غربة في اللوكيشن والأهم، إن أستاذ عصام نصار، المخرج، شخص هادي ولطيف جدًا، بيعرف يوصل المعلومة للممثل بطريقة بسيطة ومشجعة، وده بيفرق معايا جدًا وبيخليني أدي بأريحية وثقة".
وأضاف كريم العمري: "من أول مرة اتقابلت مع أحمد فهمي ومرام علي حسيت إنهم شخصيات جميلة ومتواضعة جدًا، ليهم مدرستهم وطريقتهم في الشغل، وكنت دايمًا بركز وبراقب تفاصيل أداءهم وطريقة تعاملهم مع المشاهد، دة كان مفيد ليا جدًا في بناء شخصيتي جوّا العمل، الشغل معاهم ممتع وبيديك طاقة إيجابية".
واختتم كريم العمري حديثه قائلًا: “أنا بحب دايمًا أدور على الشخصيات الصعبة والبعيدة عني، لأنها تكون تحدي وتطلع إمكانيات وخبرات جديدة، وتمنحني ثقة أكبر في نفسي، هذا الدور في الحقيقة كنت رافضه في الأول، وكلمت أحمد عبد الهادي وقلت له مش هعمله، وكلمت أستاذ عمرو محمود ياسين وطلبت دور تاني لكن هما الاتنين قالولي إن الدور مهم جدًا وصعب، وإنه هيتشاف، وده اللي شجعني عرضت الدور على الدكتور فريد، وانبسط بيه جدًا، وتشجيعه كان له تأثير كبير علي، وخلاني أحب الشخصية بعد ما كنت مش متقبلها وبالنسبة للكوميديا، أنا فعلًا نفسي أجربها حاسس إني هقدر أقدم فيها حاجة مختلفة".
أبطال مسلسل "2 قهوة"
المسلسل بطولة أحمد فهمى، مرام علي، محسن محيى الدين، مي القاضى، نانسي صلاح، حازم إيهاب، بسنت أبو باشا، إسماعيل فرغلى، أحمد الشامي، حسناء سيف الدين، باهر النويهي، معتز حسين، عمر رياض، كريم العمري، أحمد عزيز، هبة الأباصيرى، بريهان أنور وعدد آخر من الفنانين، والمسلسل من تأليف عمرو محمود ياسين وإخراج عصام نصار وإنتاج أحمد عبد العاطي.