سهير جودة ومفيدة شيحة يدافعن عن آسر ياسين بعد الهجوم عليه
علقت الإعلاميات سهير جودة ومفيدة شيحة على الهجوم الذي تعرض له الفنان آسر ياسين عقب ظهوره في “بودكاست” مع الفنان عباس أبو الحسن، حيث تحدث آسر خلال اللقاء عن بداياته في عالم التمثيل وما واجهه من صعوبات.
وفي السطور التالية ينقل لكم موقع “وشوشة” أبرز تصريحات الإعلاميات مفيدة وسهير خلال حلقة اليوم الأحد، من برنامج "الستات" المذاع عبر شاشة “النهار”.
مفيدة شيحة: آسر ياسين قصة كفاح حقيقية رغم خلفيته التعليمية
أوضحت الإعلامية مفيدة شيحة قائلة: “هو حكى إنه تخرج من كلية الهندسة بالجامعة الأمريكية، وكان معاه مجموعة من أصدقائه، كل واحد فيهم كان له حلم مختلف عن الثاني، وهو حلمه إنه يكون ممثل، وكان فاكر إنه أول ما يدخل مجال التمثيل هيبقى عمر الشريف”.
وأضافت: “آسر حكى عن الكفاح الكبير اللي خاضه علشان يوصل، وقال إنه في بدايته كان بيقعد في أوضة فيها 15 شخص، وأنه تعب زي أي إنسان بيكافح علشان يحقق حلمه”.
وأوضحت أن التعليقات على السوشيال ميديا انقسمت إلى شقين: "الشق الأول أشخاص شجعوه وافتخروا بكلامه، والآخرون انتقدوه معتبرين إن كونه خريج الجامعة الأمريكية يعني إنه غني ومن طبقة عليا، فتساءلوا لماذا يحكي قصة كفاح؟".
سهير جودة: مش لازم أكون فقير علشان أكافح
من جانبها، علقت الإعلامية سهير جودة على الانتقادات قائلة: “في ناس على السوشيال ميديا مابتعملش حاجة غير إنها تنتقد أي حد عايز ينجح أو يوصل لحاجة، وأي شخص بيسعى للنجاح لازم يمر برحلة كفاح، بغض النظر عن طبقته”.
وأضافت: “مش معنى إنه خريج الجامعة الأمريكية إنه غني؛ ممكن يكون واخد منحة تفوق، وفي ناس كتير جدا من الطبقة المتوسطة أولادهم في الجامعة الأمريكية، فده مش مقياس للثراء”.
وتابعت: “نفسي أفهم ليه الناس رابطين الكفاح بالفقر، لازم نغير وجهة نظرنا عن الكفاح والسعي، لأن النجاح مش حكر على طبقة معينة”.
مفيدة شيحة: الأحلام مش ملك الفقراء بس
وأضافت الإعلامية مفيدة شيحة قائلة: “الكفاح مش معناه إن الواحد لازم يكون فقير، على فكرة الأحلام موجودة عند الغني والفقير والمتوسط، آسر كافح علشان يغير مجاله من الهندسة للتمثيل، اشتغل على نفسه لحد ما بقى نجم كبير وممثل محترف”.
وأكملت حديثها قائلة: “مش لازم النجاح يكون بس علشان معايا فلوس، ممكن أكافح عشان حلمي، وده في حد ذاته كفاح يستحق الاحترام”.
الكفاح لا يقاس بالمال ولا بالمستوى الاجتماعي
واختتمت الإعلاميات سهير جودة ومفيدة شيحة حديثهن: “عمر تحقيق الأحلام ما هيتربط بالفلوس، ولا حتى بمستوى العيلة اللي أنا جاية منها، ولا بالظروف المحيطة، اللي عايز ينجح بيكافح مهما كانت الظروف، والنجاح الحقيقي هو إنك ماتتنازلش عن حلمك”.