شيكابالا يكشف كواليس أزمته مع الكابتن حسن شحاتة

كشف لاعب كرة القدم محمود عبد الرازق شيكابالا عن كواليس أزمته مع الكابتن حسن شحاتة، المدير الفني الأسبق لمنتخب مصر.

وخلال السطور التالية ينقل لكم موقع "وشوشة" تصريحاته خلال إستضافته في برنامج “ضيفي” مع الإعلامي الكبير معتز الدمرداش.

أكد شيكابالا أنه يقدر كل مدرب تعامل معه خلال مسيرته الكروية، قائلاً:"تعاملت مع مدربين عظماء في تاريخي بجد، وكل واحد فيهم علمني حاجة وأضاف ليا حاجة."

حسن شحاتة... أيقونة كروية متحركة

وأضاف شيكابالا أنه يرى الكابتن حسن شحاتة أيقونة كروية متحركة، وصاحب تاريخ عظيم سواء في نادي الزمالك أو كمدرب لمنتخب مصر لكرة القدم.
وقال:"بالنسبة ليا كابتن حسن شحاتة ده أيقونة، وليه تاريخ عظيم جداً في نادي الزمالك، ومن أعظم الناس اللي لمست الكرة في مصر كلها."

رؤية مختلفة بين المدرب واللاعب

وأوضح شيكابالا أن مدرب كرة القدم يمنح كل لاعب خريطة ليسير عليها داخل الملعب، و يعتمد اللاعب على موهبته الخاصة لتطبيقها.
وقال:"هو بيحط السيستم أو الخريطة، وأنا بكمل بالموهبة اللي ربنا أنعم عليا بيها، لكن كابتن حسن لما جابني في المنتخب قالي مش عايزك تلعب بالكعب."

وأشار شيكابالا إلى أن الكابتن حسن شحاتة سبق وشاهده يلعب بنفس الطريقة التي جعلته يختاره للمنتخب من الأساس، متسائلاً:"إزاي تشوف شيكابالا بيلعب كده، وتختاره عشان كده، وبعد كده تطلب منه يغير طريقته"
وأضاف موضحاً وجهة نظره بمثال:"يعني مثلاً، عمرك ما هتقدر تقول لرونالدينيو ما تبصش للكرة وتبص الناحية التانية، لأن ده أسلوبه، يبقى مش منطقي إنك تطلب مني أغير طريقتي اللي أصلاً عجبتك في الملعب."

شيكابالا:"مش قصدي أتمرد... دي موهبة من عند ربنا"

واختتم شيكابالا حديثه قائلاً :"لما تقولي كده، مش هعرف أصلاً أعملها، لأن ربنا مديني المهارة دي والموهبة دي، وده رزق من عند ربنا، لازم أطلعها وأمتع الناس اللي بتحب الكورة وهي بتتفرج علينا، وأنا وقتها مش قصدي ألعب بالكعب، بس لما بتيجي الفرصة بعملها غصب عني، لأن موهبتي عايزة كده، أنا برسمها وهي جاية إني هلعبها كده، مش قصدي أتمرد أو إني مش عايز أسمع كلام المدرب، بالعكس، مش كده خالص."