أزمة الكوميديا تعود للواجهة مع رجوع يوسف معاطي.. فنانون لـ"وشوشة": التخصص اختفى والضحك بقى تقيل

بعد غيابٍ استمر لسنواتٍ عديدة، شهدت عودة الكاتب ومؤلف أشهر الأعمال الكوميدية يوسف معاطي اهتمامًا كبيرًا من الجمهور عبر منصات التواصل الاجتماعي خلال الأيام الماضية، خاصةً عقب الإعلان عن تعاونٍ درامي جديد يجمعه بالفنان محمد هنيدي، والمقرر عرضه ضمن أعمال موسم مسلسلات رمضان 2026.
وقد أثار هذا الإعلان تساؤلاتٍ عديدة حول سبب قلة الأعمال الكوميدية والمرحة التي تعلق بها الجمهور خلال السنوات الماضية: هل يعود السبب إلى قلة المؤلفين؟ أم إلى ندرة الأفكار الجديرة بالإنتاج؟ أم إلى تغيّر ذوق الجمهور تجاه هذا النوع من الأعمال؟

وفي هذا السياق، قالت الفنانة انتصار، في تصريحات خاصة لـ"وشوشة"، معلقةً على سبب قلة الأعمال الكوميدية: "المؤلف اللي كان بيكتب الأعمال الكوميدية مش موجود دلوقتي، المؤلفين الحاليين مش كتاب كوميدي، والتخصص مبقاش موجود في الأعمال الكوميدية. زي زمان مثلاً في (ميزو)، كنا بنلاقي المؤلف والمخرج كوميديان، لكن دلوقتي اختفوا، ومبقاش عندنا اللي كان موجود قبل كده، الموجودين دلوقتي بيحاولوا."

وأضافت انتصار: "كمان بتوع الكوميدي مبقوش موجودين، الكوميدي بقى معتمد أكتر على خفة ظل الممثلين، والممثل بيحط مجهود كبير في الشغل لأنه كـ«كوميديان» هو اللي بيعمل الإضافات."

وعلى الجانب الآخر، كشف الفنان علاء مرسي أن سبب قلة الأعمال الكوميدية مؤخرًا يعود إلى صعوبة الكتابة الكوميدية، موضحًا: "طول عمر كتاب الكوميدي عددهم قليل مقارنة بكتاب الدراما والتراجيدي. ممكن يكتبوا، لكن فكرة التخصص بتفرق. وده بيرجع لأسباب كتير، منها العرض والطلب في الشارع المصري."

وتابع علاء مرسي قائلًا: "إحنا محتاجين نفتح الباب لظهور جيل جديد من كتاب الكوميديا، وكمان نهتم بعودة الكتاب القدامى، زي عودة يوسف معاطي للتعاون مع محمد هنيدي، ودي خطوة مهمة عشان نحل الأزمة دي. أعتقد إن رجوعه هيحفز ناس كتير من جيله يرجعوا. بس لازم نعرف إحنا بنقدّم لمين، والجمهور محتاج وجبة واضحة. أنا دايمًا بقول: افتحوا الباب للمواهب الجديدة، ولازم نشجع وجود ألوان درامية مختلفة. وأتمنى رمضان الجاي يكون فيه عمل كوميدي بحت."

أما الناقد أحمد سعد الدين، فعقّب على الأمر قائلًا إن السبب وراء قلة الأعمال الكوميدية هو ندرة المؤلفين المتخصصين، موضحًا: "أساتذة الكوميديا بقوا قليلين جدًا. النهارده الورش اللي بتكتب بتعتمد على النكتة والأفيه، لكن دي مش كوميديا حقيقية. الكوميديا الحقيقية هي كوميديا الموقف والعمق. شوف مثلًا فيلم (بطل من ورق)، ممدوح عبد العليم وآثار الحكيم مكنوش نجوم كوميديا، لكن الورق كان حقيقي، والكتابة كانت فيها صدق. المشكلة دلوقتي في غياب الكلمة الصح والمؤلف المثقف اللي يقدر يكتب عمل كوميدي محترم."