ناهد السباعي: التأثير أهم من حجم الدور.. وفيلم "السادة الأفاضل" تجربة جماعية مميزة
كشفت الفنانة ناهد السباعي عن كواليس مشاركتها في فيلم "السادة الأفاضل"، مؤكدة أن العمل يمثل تجربة فنية مختلفة، جمعت بين نخبة من الفنانين في أجواء مليئة بالحماس والتعاون، وأنها تعتبر الفيلم من أهم الأعمال التي قدمتها مؤخرًا، نظرًا لما يحمله من رؤية إخراجية مميزة وتحدٍ تمثيلي خاص.
“الدور مش بحجمه.. لكن بتأثيره”
قالت ناهد السباعي خلال لقائها ببرنامج "الصورة" مع الإعلامية لميس الحديدي على شاشة قناة النهار:“عمر أهمية الدور ما كانت بحجمه، لكن بقيمته وتأثيره في الحكاية. الفيلم كله متشابك، وكل شخصية ليها دور بيكمّل التانية، ومفيش بطل واحد، لأن الحكاية مبنية على تضفيرة جماعية متقنة.”
وأشارت إلى أن ما جذبها للمشاركة هو طبيعة العمل نفسه، مضيفة: “لو ماكنتش هأثر في الأحداث ماكنتش شاركت، لأن الدور عندي لازم يضيف حاجة، حتى لو مش بمساحة كبيرة.”
“كريم الشناوي بيخلي كل ممثل يحس إن دوره الأهم”
وتحدثت ناهد عن تعاونها الأول مع المخرج كريم الشناوي، قائلة إن العمل معه كان “أمنية قديمة اتحققت”، لأنه يمتلك أسلوبًا خاصًا في التعامل مع الممثلين، ويمنح كل فنان شعورًا بأن وجوده محوري داخل القصة.
وأضافت:"هو بيحب الممثل جدًا، وده باين في طريقته في الإخراج. بيخلينا نحس إننا كلنا أبطال، حتى لو المشهد بسيط. وده اللي مخلي الفيلم شكله جماعي فعلاً.”
“الفيلم كله بيحصل في يوم واحد”
وكشفت السباعي عن أن أحداث الفيلم تدور خلال يوم واحد فقط، داخل مكان واحد، مما جعل الأداء التمثيلي تحديًا كبيرًا: “الفيلم كله في يوم واحد، فمفيش حد دوره صغير أو كبير. إحنا كنا بنسلم لبعض، وكل ممثل بيكمّل اللي قبله، فالموضوع محتاج تركيز وطاقة.”
واستعادت ناهد ذكريات التصوير : “كنا داخلين البروفة وشايفين بعض فقلنا: إيه ده! كل دول معانا؟ كانت هيصة حقيقية! كمية نجوم كبيرة ومواهب مختلفة، بس اللي جمعنا هو روح واحدة.”
وعن مشهد الخناقة الشهير، قالت :أنا اللي اتضربت في الخناقة مش العكس! بس كانت من أكتر المشاهد اللي الناس هتحبها.”
وفي ختام حديثها، عبّرت ناهد السباعي عن فخرها بالمشاركة في "السادة الأفاضل"، مؤكدة أن الفيلم يقدم مزيجًا بين الكوميديا والدراما بطريقة جديدة ومختلفة، تبرز قوة الفريق وتنوّع الشخصيات، قائلة:“ده عمل هتخرج منه مش بس مبتسم، لكن كمان متأمل في تفاصيل الناس اللي حواليك.”