حسن الرداد على هامش مهرجان الجونة: بعشق السينما.. والجونة من أجمل الأماكن

عبر الفنان حسن الرداد عن سعادته بالمشاركة في فعاليات مهرجان الجونة السينمائي هذا العام، مؤكدًا أن وجوده في المهرجان بمثابة عرس فني وثقافي يجمع صناع السينما من مختلف أنحاء العالم.

وقال حسن الرداد في لقاء خاص على هامش مهرجان الجونة: "أنا طبعًا بعشق السينما، والجونة كبلد جميلة جدًا، والسبوت بتاعها خطير ومميز جدًا في مصر، معمولة بشكل رائع، ومن أجمل الأماكن في الحياة بالنسبة لي".

وتابع حسن الرداد حديثه قائلا: "ومع وجود مهرجان سينمائي فيها، اللي هو أكتر حاجة بحبها، بيبقى عرس فني وثقافي حقيقي؛ بنلتقي فيه بفنانين من كل دول العالم، وبنشوف أفلام وندوات مختلفة، وكمان بشوف ناس مبقدرش أقابلهم في القاهرة، فببقى سعيد جدًا".

حسن الرداد يكشف عن فيلمه الجديد "طه الغريب"

وكشف الرداد عن تفاصيل مشروعه السينمائي القادم، قائلًا: "إن شاء الله عندي فيلم اسمه ”طه الغريب"، مأخوذ عن رواية بنفس الاسم للمؤلف محمد صادق، وهو كمان اللي كاتب السيناريو والحوار، والإخراج لأستاذ عثمان أبو لبن، والإنتاج للأستاذ أحمد السبكي، وإن شاء الله ندخله قريب جدًا".

رأيه في تحويل الروايات إلى أفلام

وعن الجدل حول تحويل الروايات الأدبية لأعمال سينمائية، أوضح حسن الرداد رأيه قائلًا: "أنا بشوف إن الأفلام اللي بتتعمل عن روايات بتبقى غالبًا أحلى من الأفلام العادية، لأن الرواية بتدي مساحة أكبر للكاتب إنه يقدم شخصيات كتيرة وتفاصيل دسمة".

وأردف حسن الرداد قائلا: "ولما الرواية بتختصر علشان تبقى فيلم، بيبقى عندك كنز من العلاقات والشخصيات والحبكات اللي بتطلع العمل مختلف وجذاب".

موضحًا أن اختلاف خيال القارئ عن رؤية الفيلم أمر طبيعي، وأضاف: "ده زي الإذاعة، وإنتي بتسمعي صوت بتتخيلي شكله، ولما تشوفيه ممكن يطلع مختلف فتستغربي نفس الشيء في الرواية، كل قارئ بيتخيل التفاصيل بطريقته، ولما يشوفها مجسدة ممكن يبقى إحساسه مختلف، لكن ده مش معناه إن الفيلم ظلم الرواية".

واستعاد حسن الرداد تعليقًا لا يُنسى وصله من أحد المتخصصين بعد عرض فيلمه "تحت تهديد السلاح"، قائلًا: "كنت عامل شخصية واحد دخل في غيبوبة أربع سنين وبيجيله نوبات صرع، وفضلت أدرس المرض مع دكتور عمرو فريد لمدة ست شهور".

واختتم حسن الرداد حديثه قائلا: "وفجأة كلمني دكتور مخ وأعصاب من أمريكا، وكان مبسوط جدًا من التشخيص اللي قدمته ساعتها حسيت إن تعبي فعلا وصل للناس الصح".