بعد فقدان أطفالها الـ 6.. أم تكشف لـ"صبايا الخير" مفاجأة عن قتل أبنائها
ظهرت والدة الأطفال الستة الذين لقوا مصرعهم بعد أن أقدمت زوجة أبيهم على تسميمهم، لتروي تفاصيل صادمة عن حياتها ومعاناتها قبل المأساة وبعدها، بكلمات يكسوها الألم والحسرة.
بدأت الأم حديثها في حلقة مؤثرة من برنامج "صبايا الخير" المذاع عبر قناة “النهار”: “أحمد كنا لسه بنقدم له وجبنا له شنطة علشان يروح الحضانة، وكنت عايزة أخليهم أحسن مننا، أنا والله ما بنام أصلًا وقاعدة بفكر فيهم، كانوا كل حياتي، وحتى وهم مش معايا كانوا دايمًا في بالي على طول، وأكتر واحدة أثرت فيا فرحة”.
وأضافت: “مكنتش أحب حد فيهم يحصله حاجة وحشة، كنت عايزة أخليهم أحسن مني، لو موت زيهم كان أريحلي، كل لما أبص في الصور بحس إنهم بيكلموني، وبقول لمرات أبوهم حسبي الله ونعم الوكيل فيكي، ده اللي بيموت واحد بياخد إعدام، أمال اللي بيموت سبعة”.
تحدثت الأم عن حياتها الزوجية فقالت: “أنا متجوزة أبوهم من 15 سنة، واتجوز عليا التانية تقريبًا من 3 سنين، اتجوزها وأنا غضبانة، ورجعت لقيته متجوزها، وقتها كان معايا برضه ستة أطفال، وهي عاشت معاهم في نفس البيت”.
وأكملت: “هو طلقني بعد ما اتجوزها، وفضلت مطلقة خمس سنين، وبعد العيد الصغير اللي فات رجعتله تاني، وقتها كانت هي عايشه في بيت لوحدها وأنا في بيت لوحدي”.
وعن دوافع الجريمة المروعة، قالت الأم: “هي اعترفت وقالت إنها كانت مضايقة مني وغيرانة مني طول فترة الطلاق، ولادي مكانوش معايا وقتها، كان معايا بس أحمد الصغير، والخمس عيال كانوا عايشين مع مرات أبوهم وأبوهم وستهم”.
كشفت الأم عن الظروف القاسية التي عاشتها قائلة: “أنا لما رجعتله بعد الطلاق رجعت عشان أبقى مع ولادي، ولما سبتهم ليه قبل كدة كان عشان مش قادرة أصرف عليهم، دول خمس عيال، ولما رجعني كان بيقعد مع كل واحدة فينا أسبوع”.
واختتمت الأم حديثها بكلمات مؤثرة: “كل لما أبص في صورهم بحس إنهم بيكلموني، أنا مش قادرة أنسى، ومش قادرة أستوعب إنهم راحوا مني، كل اللي بقدر أقوله دلوقتي حسبي الله ونعم الوكيل”.