الملحن يوحنا فيكتور لـ”وشوشة”: “قضى عليا الحنين” لمست لطيفة من أول لحظة
عبّر الملحن يوحنا فيكتور عن سعادته بتعاونه مع النجمة لطيفة في أغنية “قضى عليا الحنين”، إحدى أغنيات ألبومها الجديد “قلبي ارتاح”، مشيرًا إلى أن العمل وُلد من لحظة إحساس حقيقية جمعته بالشاعر أحمد العزب.
وقال في تصريح خاص لـ”وشوشة”:"كلمات الأغنية وصلتني من صديقي الشاعر المميز أحمد العزب، اللي بشتغل معاه دايمًا، وشغلنا بيكون مختلف دايمًا مع بعض، ولما قريت الكلمات حسّيت إنها مكتوبة بشكل غير تقليدي من حيث التقطيعات، ومعانيها قوية جدًا بتلمس أي شخص، لأنها بتتكلم عن الحنين للناس اللي فرقونا.. وبدأت ألحنها فورًا".
وكشف يوحنا فيكتور عن أن الأغنية وصلت إلى لطيفة بالصدفة، قائلًا:"الأغنية كانت مع صديقتي روجينا، اللي دايمًا ذوقها عالي جدًا في الأغاني، وهي اللي عرضتها على لطيفة، واللي بدورها عجبتها فورًا، لأنها لمست فيها جزء حساس جدًا يخص فراق الأحباب والحنين ليهم، واتواصلت معايا على طول وقالتلي (الأغنية لمستني من أول مرة سمعتها)".
وتابع الملحن حديثه عن كواليس تنفيذ الأغنية:"بعتنا اللحن للموزع مؤمن ياسر، اللي قدر يعمل توزيع هايل أضاف كتير للأغنية. وبحكم دراستي في معهد الموسيقى العربية، كنت حابب أبرز المقامات الشرقية، خصوصًا مقام البياتي في جملة البداية، لكن بشكل عصري وسلس على الأذن، وده اللي ساعد فيه مؤمن باستخدامه لإيقاعات وأصوات قريبة من الموسيقى الغربية.”
وأشار يوحنا إلى حضوره جلسة تسجيل الأغنية، موضحًا:"كنت موجود وقت تسجيل لطيفة، وده بطلب منها لأنها بتحب وجود فريق العمل معاها، وفعلاً كانت حاسة بكل كلمة في الأغنية، وقدرت توصل الإحساس للجمهور بشكل رائع".
وأختتم حديثه قائلاً :"أنا فخور جدًا بتعاوني مع فنانة كبيرة زي لطيفة، مش بس لأنها نجمة، لكن لأنها إنسانة راقية ومتواضعة، وبتسمع كل ملاحظة بروح جميلة. وشرف ليا إن اسمي يكون موجود ضمن ألبوم مهم زي (قلبي ارتاح)، وإن شاء الله ميكونش التعاون الأخير".