رامي جمال: عمرو دياب لا يُنافَس.. وشرف ليا إنه أخذ مني التريند
أكّد الفنان رامي جمال أنه لا يرى نفسه في منافسة مع النجم الكبير عمرو دياب، موضحًا أن ما وصل إليه "الهضبة" يُعدّ تاريخًا أسطوريًا لا يمكن مقارنته بسهولة.
وقال رامي جمال، خلال حديثه في برنامج "احمد 7الساعه 7" المذاع على نجوم fm: "أنا واحد من جمهور عمرو دياب، وبسمعه وبحبه، وفكرة المنافسة معاه مش بتجيلي أصلًا، لأنه حفر تاريخه من سنين، واللي عايز يقارنه لازم يقعد ينجح 40 أو 50 سنة، وساعتها الجمهور هو اللي يحكم، وأنا أصلاً مش من جيله علشان نتحط في مقارنة".
وأضاف: "بحاول دايمًا أوضح لجمهوري إني من جمهور عمرو دياب المتعصب، وفيه ناس بتحب تسمع مزيكا وبيسمعوني زي ما بيسمعوا عمرو، ومفيش تعارض".
وعن تزامن طرح ألبومه الجديد مع ألبوم عمرو دياب، قال: "فيه ناس قالت إزاي تنزل ألبومك مع عمرو دياب؟ بس ده كان زمان وقت الـ CD، وكان طبيعي لو معاك 100 جنيه هتشتري ألبوم عمرو، لكن دلوقتي إحنا في عصر الأونلاين، لو عجبك 10 أغاني لعمرو هتسمعهم، ولو عجبك 10 لرامي هتسمعهم برضه، وده في صالح المستمع مش ضد الفنانين".
واختتم رامي جمال حديثه قائلاً: "أنا نزلت ألبومي يوم 1 يوليو وتصدرت يوتيوب يوم 1 و2 و3، وبعد كده عمرو نزل ألبومه بعدي بأربعة أيام، وخد مني المراكز الأولى، وبقيت أنا في 4 و5 و6، ولما اللي ياخد مني التريند يكون هو عمرو دياب، فده شرف كبير جدًا ليا، لأنه ببساطة هو صاحب المزيكا والأسطورة الحية اللي عايشين فيها".