آسر ياسين: مكنتش أتخيل أبقى ممثل والموضوع جه بالصدفة!
كشف الفنان آسر ياسين عن كواليس دخوله عالم التمثيل، مؤكدًا أن فكرة التمثيل لم تكن على الإطلاق ضمن أحلامه في صغره، بل جاءت بشكل غير متوقع تمامًا.
وقال آسر ياسين خلال حواره في برنامج "صاحبة السعادة" المذاع على قناة DMC: "استحالة وأنا صغير كنت أفكر إني أكون ممثل أصلًا! الموضوع جه معايا بالصدفة، لأن كنت داخل هندسة في الجامعة الأمريكية، وهناك دخلت مسرح الجامعة، وكان قوي جدًا، وحبيت المسرح لدرجة إن قبل ما أتخرج كنت محدد كاريري خلاص إني هبقى ممثل".
وتابع: "التمثيل على المسرح مختلف تمامًا عن السينما والتليفزيون، لكني كنت حابب الموضوع جدًا، وحسيت إني محتاج أعيش شخصيات تانية، ومش عايز أشتغل اللي كنت متخيله في الأول، والحمد لله ربنا وفقني".
وأكد آسر أن قراره لم يكن سهلًا، خاصة في ظل رفض الكثيرين من المحيطين به، قائلًا: "ناس كتير مكانوش مرحبين بالفكرة، حتى أصحابي، وقليل أوي اللي شجعوني وكملوا معايا، من ضمنهم أخويا اللي كان بيساندني، والدتي مكانتش موافقة خالص وكانت عايشة وقتها في أبو ظبي، وكانت تكلمني كل يوم تعيط وتقولي إنت بتضيع مستقبلك".