فاروق فلوكس: محدش بقا بيطلبني.. ولم أعتزل الفن!‎

أكد الفنان  فاروق فلوكس أنه لم يبتعد عن الساحة الفنية بإرادته، مشيرًا إلى أن غيابه في الفترة الأخيرة يرجع لعدم تلقيه أي عروض للمشاركة في أعمال فنية.

وقال فاروق فلوكس، خلال مداخلة هاتفية في برنامج تفاصيل" المذاع على قناة صدى البلد2: "محدش عرض عليا حاجة ومش أنا السبب في غيابي،  أنا غايب لأن محدش طلبني في شغل." 

وأضاف: "يظهر كمان إن كبار السن من الفنانين مبقوش يُطلبوا كتير علشان الجيل الجديد ليه وضعه وليه تكوينه، فالجيل القديم مريح شوية."

ونفى فاروق فلوكس أي نية للاعتزال، موضحًا: "بأنهي منطق أقول إني اعتزلت؟! لو كنت برفض أعمال تُعرض عليا يبقى ممكن أقول اعتزلت، لكن لا محدش طلبني أصلاً."

وعن أقرب الأعمال إلى قلبه، قال: "كل ما قدمته في المسرح أو السينما أو التليفزيون أو الإذاعة بحبه وراضي عنه، عمري ما اشتغلت عمل وأنا مش مقتنع بيه، ومش ممكن أقدم دور مش لايق عليّ، فكرة إني أعمل بلطجي مثلًا لا تناسبني لا شكلاً ولا مضمونًا."

واختتم فاروق فلوكس حديثه قائلاً: "بكتب حاليًا كتاب عن قصة حياتي إسمه 'الزمن وأنا'، فيه محطات كتير تستحق التوثيق."