محمد أبو داوود: أجسد مدير مدرسة في "برشامة".. والعمل يناقش قضايا المجتمع

أعرب الفنان محمد أبو داوود عن سعادته بالمشاركة في فيلم برشامة، مشيرًا إلى أنه انتهى من تصوير نحو نصف مشاهده.

 قال في تصريح خاص عبر"وشوشة" :"صورت تقريبًا نص مشاهدي في الفيلم، ولسه معرفش إمتى هيتم استكمال التصوير، لأن التفاصيل دي بيكون المخرج هو الأدرى بيها كمان ميعاد عرض الفيلم لسه ما اتحددش بشكل نهائي".

وتحدث  "محمد أبو داوود" عن أسباب حماسه للمشاركة في الفيلم، موضحًا: "اللي شدني هو طبيعة الدور والفكرة نفسها. الفيلم كوميدي لكنه بيناقش قضايا حقيقية في المجتمع، وده معمول في إطار لطيف وخفيف الدم، بعيد عن الجفاف أو المباشرة. ودي النوعية اللي بتميل ليها ذوقيًا".

وأضاف:"أنا بيهمني دايمًا إن العمل يكون جيد من كل النواحي، وبرشامة بيجمع بين عناصر مهمة زي الكتابة المحترمة، والإخراج المتميز، والإنتاج القوي كمان فريق العمل كله من الشباب اللي بعتز بيهم، وبحب أشتغل معاهم".

وعن تعاونه مع المخرج خالد دياب، قال: "التعاون مع الأستاذ خالد دياب كان ممتع جدًا، هو مخرج أعماله السابقة بتشهد له، ودي أول مرة أشتغل معاه، لكن متابع شغله من زمان وباحترمه جدًا".

وأردف قائلاً:"كمان بعتبر نفسي محظوظ بوجود مجموعة من الفنانين الشباب اللي بعتز بيهم، وعلى رأسهم النجمة ريهام عبد الغفور، بنت صديقي الفنان الكبير الراحل أشرف عبد الغفور، رحمة الله عليه".

واستكمل حديثه قائلًا:"الفيلم بيضم مجموعة مميزة من النجوم، منهم مصطفى غريب، هشام ماجد اللي بعتبره فنان موهوب وهادئ ومختلف في كل عمل بيقدمه، وكمان عارفة عبد الرسول، وحاتم، وكمال أبو رية اللي بيجسد دور مدرس ضمن أحداث الفيلم".

واختتم محمد أبو داوود حديثه قائلًا:"بدور في الفيلم شخصية مدير مدرسة، واسم الفيلم برشامة بيرمز طبعًا لفكرة الغش في الامتحانات أتمنى إن الفيلم ينال إعجاب الجمهور وقت عرضه، ويحقق النجاح اللي كلنا بنتمناه".

أبطال فيلم برشامة

وشارك في بطولة الفيلم كلاً من: هشام ماجد، وريهام عبد الغفور، مصطفى غريب، فدوى عابد، باسم سمرة، محمد أبو داوود، عارفة عبد الرسول، كمال أبو رية، والفيلم تأليف أحمد الزغبي وشيرين دياب وإخراج خالد دياب، من إنتاج أحمد الدسوقي شركة sky limit.