المنتج أحمد الدسوقي يكشف كواليس انضمامه لفيلم Happy Birthday

كشف المنتج أحمد الدسوقي كواليس انضمامه لفيلم Happy Birthday، مؤكدًا إن الحكاية شدته من أول لحظة، وبالأخص شخصية الطفلة "توحة"، اللي اعتبرها قلب الفيلم وروحه.

وقال الدسوقي خلال استضافته عبر برنامج" معكم مني الشاذلي" المذاع عبر قناة ON، إن أكتر شئ لمسه كانت بساطة الحكاية وإنسانيتها، وأضاف: "من أول ما سمعت عن فكرة الفيلم، حسّيت إني عايز أكون جزء منها.. لأن جوه القصة في إنسان حقيقي، واللي زاد تمسكي بيها هو شخصية توحة.. الطفلة دي خلتني أمشي مشوار طويل عشان ألاقي ضحى، البنت اللي قدرت توصل إحساسها ببساطة وصدق كبير".

وتابع: "الفيلم بالنسبالي مش مجرد إنتاج، دي تجربة مشيت فيها من القلب، وكان نفسي أوصل مع المخرجة سارة جوهر لحاجة تلمس قلوب الناس في أي مكان في العالم".

وأشاد الدسوقي بدقة المخرجة سارة جوهر واهتمامها بأدق التفاصيل، وقال: "سارة كانت بتركز في كل حاجة.. من الكادر لأداء الممثلين للإضاءة، وده اللي خلى الفيلم يطلع بالشكل ده كنا دايمًا بنسأل نفسنا: المشهد ده حقيقي؟ البنت دي شبه الناس اللي حوالينا؟ وده كان سر النجاح".