كادت تفقد وجهها.. نيللي كريم تروي موقفًا صادمًا

قالت الفنانة نيللي كريم إنها مرت بتجربة من أصعب اللحظات في حياتها، بدأت بوجع غريب في وشها ماكانش بيروح، وجربت تزور كذا دكتور، وكلهم قالوا نفس الكلام: "التهاب بسيط في الأذن" لكنها كانت حاسة إن فيه حاجة مش مريحة، وإن التشخيص ده مش مقنع.

 وحكت نيللي خلال استضافتها عبر برنامج "Mirror"، إنها نامت في يوم وشفِت حلم مخيف، حسّت فيه إنها مريضة جدًا، وصحيت مفزوعة بتنهج وبتعرق، وقالت: "وقتها قلبي قالي إني لازم أراجع نفسي، ورُحت فعلاً عملت فحوصات تانية، والمفاجأة كانت إني عندي ورم كبير في وشي، طوله 10 سم".

وقررت تسافر أمريكا علشان تعمل العملية، لكن اللي كان شاغلها مش بس الجراحة، إنما الخوف على وشها، شغلها، ومستقبلها كممثلة. قابلت الدكتور وقالت له بكل وضوح: "أنا فنانة، ووشي ده شغلي، مفيش مجال لأي غلطة". الدكتور تفهم كلامها، وقرر يأجل العملية يوم واحد بس علشان ينسق مع جراح تجميل يتدخل معاهم.

واختتمت نيللي كلامها وهي بتحمد ربنا: "عدت على خير، ومفيش أثر حتى بسيط في وشي.. كانت تجربة مرعبة، لكن ستر ربنا كان سابقني بخطوة، والحلم ده أنقذ حياتي".