ياسمين عز: جوزك بيتسحب الفجر؟ ده بيشجع الأهلي مش بيخونك!
أثارت الإعلامية ياسمين عز جدلًا واسعًا من جديد بتصريحاتها، بعدما وجهت رسالة مباشرة للسيدات، دافعت فيها عن ولاء الأزواج لناديهم المفضل، وخاصة النادي الأهلي.
وقالت ياسمين خلال برنامجها "كلام الناس" المذاع عبر قناة MBC مصر، "ما تقوليش لجوزك ما أنت بتسهر أهو عشان الماتش، إنتي بتقارني نفسك بالأهلي؟! الأهلي ده راح السعودية وأمريكا وهو قاعد على الكنبة!"، مشددة على أن حب الرجل لناديه لا يقارن بأي شيء، حتى وإن بدا للبعض مبالغًا فيه، وضربت أمثلة ساخرة عن تصرفات بعض السيدات التي تصل لحد كتابة محاضر ومحاكمات زوجية بسبب مباراة.
وتابعت حديثها: "ما تخليش معركة خسارة الأهلي خط أحمر، إنتي عمرك فرحتيه زي ما الأهلي فرحه؟!"، وطالبت بعدم تهويل الأمور وتفهم مشاعر الرجل تجاه فريقه.
وأضافت: "لو لقيتي جوزك بيتسحب على طراطيف صوابعه الفجر، ده لا بيخونك ولا متجوز عليكي.. ده رايح يتفرج على الأهلي في كأس العالم.. قومي قطعيله بطيخ فيليه من غير لب".