تامر حسني يطمئن الجمهور على ابنه ويشكرهم على دعواتهم له
كتب الفنان تامر حسني على صفحته الرسمية على موقع التواصل الاجتماعي "فيسبوك" منشورا طويلا يطمئن فيه الجمهور على ابنه آدم، ويشكرهم على الدعوات التي قاموا بها له.
وقال تامر حسني عبر منشور على صفحته الرسمية عبر موقع التواصل الاجتماعي "فيسبوك": “أنا مش عارف أشكركم إزاي على كمّ الدعوات اللي دعيتوها لربنا لشفاء آدم ابني اللي جاتلي منكم هنا وعلى تليفوني و تليفونات كل المحيطين بيا هو عمل عمليتين كبار بسبب انفجار الزايدة المفاجئ، اللي كانت أعراضه سخونية عادية بس وبقولكم كدة عشان تبقوا حريصين مع نفسكم أكتر ولولادكم، ومش كل سخونية تقولوا دة شوية برد وخلاص لا روحوا اكشفوا كويس واعملوا سونار على البطن والزايدة مرة و٢ عشان برضو ساعات مش بيبان ولازم الدكتور يضغط بطريقة معيّنة، تقريبا أقوى شوية عشان يعرف لإني سمعت كتير اليومين دول إن الزايدة خادعة”.
وأضاف تامر: "اطمنوا كذا مرة قبل لحظة انفجارها عشان بجد مشاكل بتحصل بعدها كبيرة ومحزنة أوي وحبيبي آدم عمل عمليتين صعبين أوي عليه وبدعواتكم مستنيين النتايج تكون خير يارب و يعدي مرحلة الخطر يا رب، بحق “كن فيكون”، اشفيه وعافيه، هو وكل ولادنا بس هو راجل وهيتحمل وإن شاء الله ربنا يكرمه ويعافيه ويحفظه هو وإخوته ويحفظ كل ولادكم يارب".
وأكمل تامر حسني حديثه قائلا: "وأحب أقول تاني شكرا من كل قلبي على دعواتكم، أنا شايف قلب كل حد فيكم وهو بيدعي بصدق متشكر أوي يا جماعة شكرا لكل اللي اهتم وسأل عن ابني ودعاله هنا أو على التليفون واللي طلعوله صدقات لشفائه من غير ما يعرفونا شخصيا أنا مش لاقي كلام أشكركم بيه وأنا برضو بدعيلكم وبقول لكم مثلها وأضعاف أضعافها وربنا يحفظكم ويحفظ أولادكم قادر يا كريم".
آخر أعمال تامر حسني
يذكر أن آخر أعمال تامر حسني فيلم “ريستارت” الذي تم إطلاقه في موسم عيد الأضحى، ويشارك في بطولته عدد من النجوم، أبرزهم هنا الزاهد، باسم سمرة، محمد ثروت، وتوانا الجوهري ومن إخراج سارة وفيق.
