طارق الشناوي: خطاب سعاد لعبد الحليم حقيقي.. وتصرف الورثة "غير أخلاقي"
علّق الناقد الفني طارق الشناوي على الجدل المثار مؤخرًا حول الخطاب المنسوب للفنانة الراحلة سعاد حسني إلى العندليب عبد الحليم حافظ، مؤكدًا صحة الخطاب ورافضًا تصرف ورثة عبد الحليم في نشره.
وقال طارق الشناوي، خلال مداخلة هاتفية في برنامج "تفاصيل" المذاع على قناة صدى البلد2: "جواب سعاد حسني لعبد الحليم بخط إيديها فعلاً، حتى أهلها لم يعترضوا أو يعلنوا أن الجواب مزوّر، لكن اللي بيحصل دلوقتي أنا شايفه تصرف غير أخلاقي، ونشر الخطاب ده كان فعل غير مسؤول من ورثة عبد الحليم حافظ، ولم يكونوا أمناء".
وأضاف: "بعد نشر الخطاب طلعوا بيان، لكن لم يعتذروا عن الخطأ، مع إن ده كان يستحق اعتذارًا حقيقيًا".
وعن مضمون الخطاب، أوضح طارق الشناوي: "الجواب لم يكشف أي شيء صريح، وقالوا إن عندهم وثيقة تؤكد إن عبد الحليم لم يتزوج من سعاد، لكن لما تقرأ الخطاب، هتلاقي امرأة بتستعطف رجل، فهل ده معناه إنه ما حصلش جواز؟ أكيد لأ، لأن دي لحظة إنسانية بتحصل بين أي اتنين بيحبوا بعض".
وتابع: "بين أي اتنين في علاقة، طبيعي جدًا إن الست تستعطف الراجل أو العكس، وده مش دليل نفي للزواج، بل ممكن يكون قرينة على وجود علاقة عاطفية حقيقية وربما زواج".
واختتم طارق الشناوي حديثه قائلاً: "أنا شايف إن ورثة عبد الحليم أخطأوا، وياريت ينسوا حكاية المحاكم والجدل ده، لأن عبد الحليم وسعاد حسني هما وجهان لعملة فنية واحدة".