تامر أمين يقترح "مشروع محمد صلاح للأبطال": لازم نستغله وهو في قمته!
أعرب الإعلامي تامر أمين عن إعجابه الكبير بالنجم العالمي محمد صلاح، مؤكدًا أن الوقت الحالي هو الأنسب للاستفادة من مكانته العالمية في دعم الرياضة المصرية.
وقال تامر أمين خلال حديثه في برنامج "آخر النهار" المذاع على قناة النهار: "من امبارح وذهني مشغول بمحمد صلاح، وشوفت مقابلته مع الزميل سيف زاهر، وكان بيتكلم بمنتهى التلقائية عن عقليته، والقرارات في حياته، والانتقالات، وكل حاجة في مشواره، بس الحقيقة مش ده اللي عاوز أتكلم فيه".
وتابع: "بالبلدي كده، أنا عاوز نستغل محمد صلاح، وفي دي أنا مستغل! لو ما استغليناش صلاح دلوقتي، هنستغله إمتى؟ ما إحنا معندناش في الكرة المصرية كتير زيه".
وطالب تامر أمين الدولة المصرية بتكريم رسمي لصلاح خلال إجازة الصيف، قائلاً: "لازم وزارة الشباب والرياضة، والحكومة، وكل الجهات، يجتمعوا ويعملوا تكريم يليق به، ويعرفوا العالم إن ده ابننا وبطلنا".
واقترح إنشاء مشروع باسم محمد صلاح: "نفكر في حاجة كبيرة، زي مشروع محمد صلاح للأبطال، أو نعمل أكاديمية كروية يشرف عليها بنفسه، مش نحط اسمه وخلاص!".
واختتم حديثه قائلاً: "مش عايزين لا اتحاد كورة ولا رابطة يدخلوا في الموضوع، لأنهم مش قادرين يديروا حتى شغلهم، وعاوز المشروع ده يبقى تابع للوزارة مباشرة، علشان ينجح ويبقى فعلاً على مستوى صلاح واسمه وتاريخه".