ابنة الراحل وليد مصطفى: كارول سماحة هي "أمي التانية"
وجّهت أمينة وليد مصطفى، ابنة الدكتور وليد مصطفى، رسالة مؤثرة إلى الفنانة كارول سماحة، مؤكدة على قوة العلاقة التي تجمع بينهما، وأن ما يجمعهما هو أكثر من مجرد صداقة.
وقالت أمينة، خلال حوارها مع ET بالعربي: "أحب أقول لكارول سماحة إننا عيلة واحدة، والحمد لله دي حقيقة، وهي بالنسبة لي أمي التانية، وبشكرها على ثقتها الكبيرة فينا، وكمان بهنيها من قلبي على حفلتها الجميلة في لبنان".
وتابعت: "اللي بنعمله النهارده هو علشان نكمل مسيرة بابا، ونزولنا للشغل من جديد مش ضعف، بالعكس، ده قوة. الفن نفسه قوة، وبيخلينا نعبّر عن مشاعر كتير جوانا".
وأشادت أمينة بموقف كارول سماحة، قائلة: "أنا بحييها جدًا على إنها طلعت على المسرح بعد الوفاة على طول، وده قرار مش سهل، لكنه بيعكس قد إيه هي قوية".
وأضافت: "إحنا كمان بنحاول نستكمل المشوار، ورغم إننا زعلانين إن بابا مش موجود، لكن دي القوة اللي زرعها فينا من وإحنا صغيرين".
واختتمت حديثها بتأثر قائلة: "الحمد لله السيرة هي اللي بتفضل بعد الرحيل، وسيرة بابا الحمد لله بتتكلم عنه، وده أكبر عزاء لينا".