أمينة خليل: كنت خجولة والناس افتكروني مغرورة

كشفت الفنانة أمينة خليل عن نظرتها للتطور الشخصي والنضج على مدار السنوات، مؤكدة أنها لا تقيس التغيير بالنسبة المئوية، بل تراه كرحلة مستمرة من الصعود والتعلّم.

وقالت أمينة خليل خلال حديثها في بودكاست katchup with injiali: "عمري ما فكرت في إني اتغيرت كام في المئة من زمان لحد دلوقتي، علشان أنا مش عارفة النهاية فين، لكن بشوفها كخطوات سلم، وكل سنة نفسي أكبر وأنضج 3 أو 4 أو 5 خطوات عن السنة اللي قبلها".
 

وأشارت أمينة إلى أنها تميل للصرامة مع نفسها، موضحة: "يمكن أنا قاسية على نفسي شوية، ولما بحس إني طلعت سلّمة أو اتنين، بقول: لا، كان عندي أكتر وممكن أطلع أكتر، وبلوم نفسي إني مكنتش اشتغلت عليها أكتر".

وتطرقت أمينة خليل إلى مرحلة الطفولة والمراهقة، وقالت إنها كانت خجولة جدًا في صغرها، الأمر الذي جعل البعض يسيء فهم شخصيتها، وأضافت: "كنت بلتزم الصمت وده كان بيتشاف إني 'تنكة'، بس ده أبعد حاجة عن الحقيقة. ولو أي حد قعد معايا هيعرف إن ده مش حقيقي خالص".

وأوضحت أنها في ذلك الوقت كانت لا تزال تكتشف نفسها وتحاول تعلّم كيفية التعبير عن مشاعرها وإبداء رأيها، قائلة: "كنت بخاف وكنت بابقى ساكتة، فالناس كانت بتشوف ده إنه غرور أو تناكة، لكنه في الحقيقة كان خجل وعدم ثقة في التعبير".