نهال عنبر تفتح قلبها لـ"وشوشة" وتحكي مواقف طريفة جمعتها بمحمود عبد العزيز

تحل اليوم الذكرى الثانية لرحيل الساحر محمود عبد العزيز، الذي قدم للفن الكثير، وفتح أغلب الفنانين قلبه لـ"وشوشة" لتوجيه الرسائل له.

ووجهت الفنانة نهال عنبر رسالة للفنان الراحل محمود عبد العزيز من خلال "وشوشة" قائلة: "الفنان محمود عبد العزيز كان بالنسبة لي عشرة عمر ويمكن من أول الناس اللي عرفتهم في الوسط الفني أول ما تزوجت ويوم ما دخلت التمثيل قالي نصيحة قالي أنا عاوزك تعملي حاجة مهمة جدا وهى لما تيجي داخلة الأستديو وعندك تصوير متروحيش تصوري أول يوم على طول روحي اقعدي في اللوكيشن أتعرفي عالناس وقبل تصوير مشاهدك بعشر أيام كل يوم روحي الأستديو تاخدي على جو الأستديو والمخرج والمصوريين لأن في الأول علاقاتي كانت قليلة بالناس اللي ورا الكامير فهو قالي مهم جدا راحة نفسية وأنتي بتصوري لأنك هتكوني متوترة لو أول يوم روحتي وانتي مش عرفة الناس وفعلا النصيحة دى كانت موفقة الى حد كبير وأخذت بيها حتى الآن في مواقف كتير جمعتني بيه فهو  كان دمه خفيف جدا في حياته العادية، كنا دايما بننزل في فنادق مع  بعض لأننا بنكون جروب كبير فكان دايما هو يلاعب الأولاد ويعضهم في إيديهم ويقولهم هعملكوا ساعة وكان ساعتها حسام أبني صغير جدا ولما كبر حسام بقى يقوله فين الساعة اللي كنت بتعملهلنا كان مصدر للبهجة والكوميديا والفرح.

وأضافت: "كان بيحب أكل أمي جدا الله يرحمها ومرة كنا في فندق وقالها أنا نفسي في المحشي واللحمة اللى بتعمليهم وطبعا مكنتش عارفة تعمل دة في الفندق اللي كنا نازلين فيه وفعلا عملتله الأكل وفتح شنطة العربية وأكل فيها، لان كان بيحب أكل ماما جدا ويوم ما حصلتلي سرقة في فندق فلسطين كان من أول الناس اللي وقفوا جنبي هو وزوجته جيجي والأستاذ أحمد سمير الله يرحمه وزوجته سهير شلبي والفنان محمد ياسين وزوجته شهيرة تركوا كل شئ ووقفوا جنبي في أزمتي سنة 1980.

وأوضحت أنه كان أخ وصديق وجدع وكنت زعلانة عليه أكتر وهو بيتألم وعاوزة أقوله وحشتنا أنت فنان عظيم جدا وأنسان أعظم فقدنا البهجة اللي كنت بتعملها لينا لكن اللي بيصبرنا أعمالك اللي بنتفرج عليها كأنك عايش معانا لأنه كان أستاذ وممثل بارع يعمل أبن بلد يعمل الجدع يعمل تاجر المخدرات يعمل الطيب يعمل الشرير يعمل الكوميديا محمود عبد العزيز علامة في التمثيل تتعلم منه الأداء وحركة عينه وتقمصه للشخصية، ومرة كنت بقدم شخصتين مختلفتين في وقت واحد فقالي أزاي أنا معرفش أندمج غير في شخصية واحدة لأنه كان بيحب يركز جدا بلبس الشخصية وشعرها وعنيها وشنبها... ربنا يرحمه ويحسن إليه".