عزيزي المواطن الثورجي .. "أقعد في حتة ناشفه "

عزيزي المواطن الثورجي بعد التحية والسلام أحب اسأل سيادتك هو انت عايز ايه ؟ يعني احنا دلوقتي بنحتفل بالعيد الرابع لما تطلق عليه " ثوره ٢٥ يناير " ولسة حضرتك ثائر وبتنزل تهتف وتصرخ وتولع ليه ؟

هو حضرتك هدفك البلد تبقي كويسة ولا عايز تفضل ثائر كده وخلاص ؟

هحاول افهم حضرتك بهدوووووء- علي طريقة استاذنا عماد الدين أديب - حضرتك نزلت في يناير  ٢٠١١ ضد حكم مبارك والعادلي ماشي ويمكن يكون عندك حق بعدين حضرتك نزلت تتظاهر في مارس ٢٠١١ضد الاستفتاء علي الدستور وقلت " لا لترقيع الدستور " وفي نوفمبر ٢٠١١ برده ضد المجلس العسكري والمشير طنطاوي ويسقط يسقط حكم العسكر مش انت اللي قلت كده ؟ برغم اعتراضي علي الجمله بس ماشي وبرده انت اللي نزلت في انتخابات الرئاسة في مايو ٢٠١٢ واديت صوتك لحمدين في الجولة الاولي وبعدين هتفت لمرسي وعصرت ليمون في الجولة الثانيه ، وانت برده اللي نزلت ضد الاعلان الدستوري بتاع الحاج مرسي في ديسمبر ٢٠١٢ وفضلت ثائر لحد ما مرسي أتخلع في ٣ يوليو والرئيس المؤقت المحترم عدلي منصور تولي منصب الرئيس ومع ذلك نزلت برده وهتفت ضده ، وبرده انت اللي نزلت وفوضت عبد الفتاح السيسي في ٢٦ يوليو في مكافحه الارهاب وانت برده اللي نزلت هتفت ضده بعد فض إعتصام رابعة والنهضة ، بعدها انت اللي نزلت عشان تدي صوتك في انتخابات الرئاسة في ٢٠١٤ اللي اكتسحها السيسي وانت اللي رجعت تاني تهتف ضده برغم انه عمل حاجات كتير في وقت قصير ولسة بيكمل لكن مبادئك الثورية تمنعك من الصبر والانتظار لرؤية النتائج ، طبعا انا متكلمتش عن ثوراتك في الاحتفالات اللي ما يعلم بيها إلا ربنا زي الاحتفال بثوره يناير و جمعة الغضب ويوم التنحي واحداث ماسبيرو ومحمد محمود وحادث بورسعيد وقصر العروبة والحرس الجمهوري وفض الاعتصام يعني انت بكده بقالك ٤ سنين ثائر يعني بقالك ١٤٦٠يوم عايش في ثورات وحواليك بحور دم سببها الارهاب وسببها الغباء ، ممكن تسأل نفسك هل انت مبسوط كده ؟

عزيزي المواطن الثورجي حاولي تهدي أعضائك عشان الناس تاخد فرصة تشتغل والعجلة تدور شوية وكمان عشان صحتك يعني " الثورة الكتير مش حلوه عشان امراض السكر والضغط والبواسير انتشرت جدا الايام دي " صدقني لو جربت تقعد في " حته ناشفة " من الدم اللي غرق الشوارع نفسيتك هتبقي أحسن والبلد كمان هتبقي أحسن .