محمد دياب:"اشتباك" خرج بشرف من منافسات مهرجان "كان"

وكتب دياب عبر صفحته بـ"فيس بوك":"جوايز مهرجان كان أعلنت و السبب الوحيد اللي مخليني زعلان إن فيلم اشتباك مخدش جايزة، كان نفسي الناس تلاقي حاجة تفرحها وسط الغم و أن كل شاب محبط يحس أنه يقدر يوصل لأي حلم حلمه". 

وتابع:"الأيام اللي فاتت حسيت إن محمد صلاح لعيب الكورة اللي بقي مصدر السعادة الوحيد وهو بينجح و بيرفع رأس مصر بين أهم أندية العالم".

وأكمل:"مع كل خبر عن الإستقبال الإيجابي للفيلم أو عن اختيار النقاد ليه من أهم ١٠ أفلام في المهرجان، أو اختياره من الخمس أفلام المدعومة من رابطة السينمات المستقلة في فرنسا كنت بشوف الناس بتفرح كأنه جون لمصر في كاس العالم". 

وأضاف:"الحاجه الحلوة إن اللخبطة اللي عايشنها في مصر بتتحول لمصدر إلهام فني لجيل جديد،معنديش شك إن كل مهرجانات العالم و أي تظاهرة  فنية هنشوف فيها فنانين مصريين هيخترعوا طرق متخيلنهاش عشان يعبروا عن نفسهم ..كنت هتضايق لو كنت حاسس إن وجودنا هنا صدفة و مش هيتكرر،بس ده اجتهاد و تعب و عرق و تفكير و أكيد مكلل بتوفيق ربنا..عشان كده متأكد إن لينا جولات تانية كتير".

واستكمل قائلأً:"يمكن تكون رحلة مهرجان كان انتهت، بس رحلة اشتباك لسه بادئة في كل مهرجانات العالم و لو الدعم اللي شايفه منكوا اتوجه لقاعات السينما في مصر، ساعتها هنشوف أفلام زي اشتباك و احلي من فنانين كتير محتاجين دعمكوا" .

واختتم قائلاً:"نفسي أشكر كل إنسان باركلنا أو دعمنا أو دافع عن الفيلم (خاصه الزملاء الفنانين) و بعتذر إني معرفتش أرد علي كل واحد و اشكره بنفسي، شكرا ليوسف شاهين و يسري نصرالله و صناع الـ٢٣ فيلم مصري اللي شاركوا قبل كده عشان أنتوا اللي فتحتولنا الباب هنا،و شكرا لكل الفنانين المصريين اللي مستوي شغلهم تطور في السنين اللي فاتت و اللي كانوا مصدر إلهام شخصي،و أهم شكر للي آمنوا بالفيلم وقت ما ناس قالت مستحيل يتعمل و كل شخص اشتغل في الفيلم و عمل أضعاف المجهود..و اللي هيشوف الفيلم ده هيعرف قد إيه اللي اشتركوا فيه بيحبوا بلدهم،أما كل واحد حس إن الفيلم بيمثله و كان بيتمنالنا و لمصر الخير و بعتلنا دعوة أو شوية طاقة ايجابية..الف الف شكر" .