خالد سرحان يفجر مفأجاة بشأن "المداح الجزء الخامس"
استضاف يوسف التهامي وفانا إمام في حلقة اليوم من «عيش صباحك» على «نجوم إف.إم»، الفنان خالد سرحان للحديث عن مشواره الفني وأحدث أعماله الفنية.
وانطلق الفنان خالد سرحان من أحدث أعماله وهو مسلسل "المداح" الذي شارك في أجزائه الأربعة حتى رمضان الماضي وقال كل الناس عايزين جزء جديد من المسلسل لكن الموضوع صعب إنك لازم تعمل حاجة أعلى من اللي فات وده الصعب في موضوع الأجزاء لأنك لازم تقفل حلو لأن كمان موضوع المسلسل شائك ولو مش مقنع 100% هيقلب كوميدي، لكن احنا بنحضر كويس وننتج كويس والمؤلفين يبحثوا كتير ويقدموا حاجات بين السطور خلال المشاهد.
وأكد خالد سرحان التحضير للجزء الخامس من مسلسل "المداح" ليتم عرضه رمضان 2025 وأنه ليس حديث التجربة بالأعمال ذات الأجزاء وقال عملت الأجزاء كتير في العيادة ويوميات زوجة مفروسة فأنا متعود على ده وإني أشتغل على الأجزاء، لأن ساعات بيبقى حد بيشتغل بس نجاح الجزء الأول وما يعملش حاجة جديدة فكده ده بيبقى يخدع الجمهور.
ثم تحدث عن شخصيته في مسلسل "المداح" وقال شخصية حسن هي نقطة في بحر لأنها بتاعت الضحك جوه مسلسل رعب علشان تظبط ده مينفعش تمشي على نفس النمط خلال كل الأجزاء ولازم يبقى الكوميديا من جوه الموقف نفسه.
كما تطرق لمشاركته في الجزء الثاني من فيلم "حريم كريم" والذي كان بعنوان "أولاد حريم كريم" وقال هو فيلم مبهج وفيه ضحك كتير وهو متصل بالجزء الأول، وإحنا عالجنا كل حاجة وعملناه لما هم كبروا وولادهم كبروا، ولو اتفرجت ع الأول والثاني بعده هتحس إنهم نفس الشخصيات بعد ما كبروا والهدف الأساسي كان النوستالجيا ومخاطبة الجيل اللي مرتبط بالجزء الأول كما تمنى خالد سرحان تقديم جزء ثاني من فيلمه الشهير مع الزعيم عادل إمام وهو فيلم "التجربة الدنماركية" وقال أحب نعمل له جزء تاني والأبطال موجودين والأستاذ عادل موجود ربنا يديله الصحة موجها رسالة للزعيم عادل إمام قال فيها الفنان عادل إمام هو اللي اكتشفني ودعم نجوم كتير هو أسطورة كبيرة وصعب تكراره وربنا يديله العمر.